“Ukraynanın 34 yaşlı Baş naziri Aleksey Qonçaruk istefa verdi. Buna səbəb gizli səs yazısının bir neçə internet saytında yayılması oldu. Həmin səs yazısında Qonçarukun nazirlərə “Prezident Vladimir Zelenskinin iqtisadiyyatdan başı çıxmır və iqtisadi mövzularda beyni dumanlıdır” dediyi iddia olunur. Qonçaruk və onun tərəfdarları isə səsin saxtalaşdırıldığını iddia edirlər. Buna baxmayaraq, o, doğru olanı etdi, səs onun olmasa da, prezidentə münasibətdə şübhə yeri qalmasın deyə istefaya üstünlük verdi”.

Bəs səs yazısını kim yazaraq saytlara servis edə bilərdi?

Politoloq Elxan Şahinoğlunun fikrincə, baş nazirin səs yazısını yazmaq üçün xüsusi avadanlıq lazımdır: “Rusiyada bəlli mərkəzlər Ukraynanın güclənməsini və iqtisadi problemlərin həllini istəmirlər. Böyük ehtimalla, Ukrayna baş nazirinin gizli səs yazılarını Rusiya kəşfiyyatı əldə edərək ukraynalı oliqarx İqor Kolomoyskinin saytları vasitəsilə ictimaiyyətə çatdırıb.

Bəs Kolomoyski bu işə niyə qarışa bilərdi?

Məsələ burasındadır ki, Kolomoyski hələ keçmiş prezident Pyotr Poroşenkonun onun bankı olan “Privatbank”ı milliləşdirməsini hakimiyyətə bağışlaya bilmir. Kolomoyski həmin bankdan hakimiyyyətə qarşı təzyiq vasitəsi kimi istifadə edirdi. Hakimiyyət dəyişdikdə düşünürdü ki, bankını geri ala biləcək, hətta bu məqsədlə mühacirətdən geri qayıtdı. Ancaq Prezident Vladimir Zelenski və Baş nazir Aleksey Qonçaruk milliləşdirilən bankı Kolomoyskiyə qaytarmadılar. Kolomoyski öz saytları vasitəsilə səs yazısını yaymaqla istefa verən baş nazirdən intiqamını almış oldu. Görünür, Kolomoyskinin növbəti hədəfi Vladimir Zelenskidir…”. (publika.az)