“RELAX” İSTİRAHƏT MƏRKƏZİNDƏ DAVA-DALAŞ:deputatın adamları Vergilər Nazirliyinin əməkdaşlarını döyüb- VİDEO

Adı mediada müxtəlif və çoxsaylı qalmaqallarda hallanan Milli Məclisin deputatı İqbal Məmmədovla bağlı daha bir şok məlumat yayılıb.

Strateq.az  Editor.az-a istinadla  xəbər verir ki, tanınmış iqtisadçı-ekspert Qulu İbrahimli özünün “Facebook” hesabında İqbal Məmmədovun ona məxsus olan “Relax” İstirahət Mərkəzinə gələn Vergilər Nazirliyinin əməkdaşlarını döydürdüyünü yazıb. İqtisadçının statusunu olduğu kimi təqdim edirik:

“İqbal Məmmədov “Relax”a gələn vergi işçilərini döydürüb. Onu bu dəfə ipdən asacaqlar.

O qədər qudurub ki, yoxlamaya gələn vergi işçilərini və köməyə çağırılan polisləri içəri buraxmayıb. Vergi işçilərini kütləvi döyüblər. Sanıram ki, dövlət və Vergilər Nazirliyi prinsipial mövqe ortaya qoymalıdır. Cəmiyyət də Vergilər Nazirliyinə güvənir. Ağlım kəsmir ki, hansısa nüfuzlu şəxs İqbal Məmmədovu bu dəfə müdafiə etsin. Həmin adam özünü də yandırar.

Vergilər Nazirliyinin yüksək rəhbər şəxsləri və Respublika Prokurorluğunun nümayəndəsi Bakıdan dünən dərhal Lerikə gediblər. Həbslər var. Sabah ətraflı bəhs edəcəyəm. Hadisəni gizlətmək mümkün deyil. Bu dəfə deputat toxunulmazlığı İqbala kömək etməməlidir.”

Qeyd edək ki, baş vermiş hadisə ilə bağlı Vergilər naziri Mikayıl Cabbarov məlumatlandırılıb və yaxın günlərdə olayla bağlı müvafiq tədbirlərin görüləcəyi deyilir.