Bu gün 17:30-da dünya ekran başında olacaq

Bu gün kinematoqrafların ən nüfuzlu mükafatı - "Oskar"ın 2014-cü il üçün nominantları məlum olacaq.

Axar.az xəbər verir ki, tədbir yerli vaxtla saat 05:30-da (Bakı vaxtı ilə 17:30) Los-Ancelesdə Beverli Hilzin Semuel Qolduin teatrında keçiriləcək.

Mərasimin sübh vaxtına salınmasının səbəbi isə Los-Ancelesdən gələn xəbərlərin dünyanın bütün əsas kütləvi informasiya vasitələrinə çatdırılmasıdır.

Bildirək ki, “Oskar” namizədlərinin elan edilməsi 2 mərhələdən ibarət olacaq. Burada rejissor Cey Cey Abrams və Alfonso Kuaron aralarında “Ən yaxşı sənədli film”, “Ən yaxşı animasiya filmi” və “Ən yaxşı vizual effektlər” də olan 11 kateqoriya üzrə nominantları elan edəcəklər.

Bundan sonra aktyor Kris Payn və Akademiyanın prezidenti Şarl Bun Ayzeks içərisində “Ən yaxşı film”, “Ən yaxşı rejissor”, “Əcnəbi dildə ən yaxşı film” olan digər 13 kateqoriyada adların siyahısını elan edəcəklər. Bundan əlavə bütün aktyor kateqoriyalarına aid olan namizədlər də səslənəcək.