Prezident “Fəlakət”ə ev verib - “Bozbaş Pictures”in “qəhrəmanı” dövlət başçısını da güldürə bilib

ATV telekanalında yayımlanan “Bozbaş Pictures” serialının tanınmış simalarından biri prezident İlham Əliyev tərəfindən mükafatlandırılıb. Modern.az saytının əldə etdiyi məlumata görə, ölkə başçısı “Bozbaş Pictures”də Fəlakət obrazını canlandıran gənc aktyor Elşən Orucova ev hədiyyə edib.

Xeyli müddətdir ki, gülüş ustasının ölkə başçısı tərəfindən mükafatlandırıldığına dair söz-söhbət gəzir.
Deyilənlərə görə, prezident İlham Əliyevin iştirak etdiyi qeyri-rəsmi tədbirlərdən birində aktyor Elşən Orucov Fəlakət obrazında İlham Əliyevin qarşısına çıxıb. Tamaşaçılarının ürəyinə “Bunu maa neçiyə verərərsən?” ifadəsi ilə yol açan Fəlakət bu dəfə dövlət başçısınıu sualla təəccübləndirib. Daha sonra “Deyirlər sizin yaxşı eviniz var. Onu maa neçiyə verərərsiz?” kəlməsi ilə İlham Əliyevi ürəkdən güldürən aktyora ölkə başçısı belə cavab verib: “Öz evimi yox, amma sənə başqa ev verərəm”.

Beləcə, İlham Əliyev aktyor Elşən Orucova ev hədiyyə edib.

Modern.az-ın əməkdaşı məlumatı dəqiqləşdirmək üçün “Fəlakət”in özü ilə saxlayıb. Aktyor məlumatı nə təsdiq, nə də inkar etdi. O, sualımızı dinlədikdən sonra belə suallara cavablandırmaq istəmədiyini söylədi.