Vətəninfo.az xəbər verir ki,bunu Azərbaycan Respublikası Milli Məclisinin deputatı Kamaləddin Qafarov bildirib.

Millət vəkilinin fikrincə, ölkə başçısı tamamilə düzgün olaraq qeyd etmişdir ki, hazırda - postneft dövründə həyata keçirilən islahatlar birinci növbədə əhalinin sosial rifahının, hər bir Azərbaycan vətəndaşının gündəlik həyatının yaxşılaşmasına xidmət edir.

"Məlum olduğu kimi,ölkə Prezidenti hələ bir neçə il bundan əvvəl bəyan etmişdi ki, biz postneft dövrünə hazırlaşmalıyıq və bu gün, əslində, postneft dövrü ilə artıq üzbəüzük. Dünyanın  neft bazarlarında pandemiya ilə bağlı müşahidə olunan iqtisadi böhran, neftlə zəngin olan bütün ölkələrin gəlirlərinə mənfi təsir göstərmişdir. Ona görə də müasir mərhələdə ölkəmizdə ən prioritet  məqsəd qeyri-neft sektorunun dinamik inkişafıdır və bu seqmentdə  reallaşdırılan  iqtisadi islahatlar nəticəsində postneft dövrünün uğuru təmin edilə bilər”.

 K.Qafarov demişdir ki, dövlətimizin başçısı digər sahələrdə həyata keçirilən islahatların prokurorluq orqanlarında da aparılmasını  çox zəruri hesab etmiş və bununla bağlı sözügedən strukturların qarşısında yaxın gələcək üçün konkret vəzifələr qoyulub.

"Məlum olduğu kimi, ötən ilin aprel ayında  məhkəmə-hüquq islahatları barədə müvafiq Fərman imzalanmışdır və bu istiqamətdə işlər davam etməkdədir. Bu baxımdan  məhkəmə-hüquq sisteminin tərkib hissəsi olan prokurorluq orqanlarında da  islahatların aparılması xüsusi önəm kəsb edir. Dövlətimizin başçısı videoformatda qəbul zamanı bu islahatların hüquq mühafizə orqanlarında , konkret halda prokurorluq sistemində qaçılmaz olduğunu açıq şəkildə bəyan etmişdir:”...Bütün sahələrdə olduğu kimi, prokurorluq orqanlarında da daha genişmiqyaslı islahatlara ehtiyac var. Bu gün Azərbaycanın hər bir sahəsində islahatların nəticələri vətəndaşlar tərəfindən yüksək qiymətləndirilir. İslahatlar yeniləşmə, yeni yanaşma, müasir şəraitə uyğunlaşma deməkdir. Biz islahatlar aparmaqla ölkəmizi gücləndiririk və ölkəmizin gələcək dayanıqlı inkişafını şərtləndiririk. Tərəqqi islahatlarsız mümkün deyil. Ona görə hüquq mühafizə orqanlarında da, digər sahələrdə olduğu kimi, islahatlara böyük ehtiyac var. Ümid edirəm ki, Azərbaycan Respublikasının Prokurorluğu bu islahatların aparılmasında uğurlar qazanacaq”.

Millət vəkili bu qəbul zamanı ölkədə ictimai asayişin qorunması, bəzi neqativ hallara qarşı mübarizənin effektiv şəkildə aparılmasının zəruriliyi ilə bağlı məqamlara toxunulduğunu bildirdi və göstərdi ki, əslində, bu məqam cəmiyyətdə narazılıq doğuran halların birmənalı şəkildə aradan qaldırılmasına yönəlmişdir.

"Prezidentimiz prokurorluq orqanlarının qarşısında ilkin olaraq başlıca vəzifə kimi qanunun aliliyinin tam təmin edilməsini və  bunun ədalətli cəmiyyətin qurulması üçün  başlıca şərt olmasını qoydu. O, hüquq mühafizə orqanları tərəfindən qəbul edilmiş qərarların  bəzi hallarda qanunlara zidd xarakter daşımasını, sosial ədalətin pozulmasını, insanların haqlı olaraq narazı salındığını və beləliklə, ümumi işə böyük ziyan vurulduğunu da dilə gətirdi”.

K.Qafarov sonda  qeyd etmişdir ki, korrupsiyaya və rüşvətxorluğa qarşı mübarizənin ön plana çəkilməsi, Ağstafa, Biləsuvar, Yevlax və Neftçala rayonlarının icra başçılarının məhz bu səbəblərdən həbs edilməsi faktları göstərir ki, dövlətimiz ictimai həyatın bütün sahələrində neqativ hallara qarşı barışmaz mövqe nümayiş etdirir və prokurorluq orqanlarında islahatların dərinləşdirilməsinə yönələn bütün bu addımlar qətiyyətli və dönməz xarakter daşıyır.