Xəbər verdiyimiz kimi DTX-nın xüsusi əməliyyat qrupu İmişli rayon İcra Hakimiyyətinin binasında axtarış aparıblar. Əməliyyat zamanı icra başçısı Vilyam Hacıyev və digər vəzifəli şəxslər saxlanılıb. Saxlanılan V.Hacıyevin oğlu Məhəmməd Hacıyev prokurorluq orqanlarında, Baş prokuror yanında Korrupsiyaya qarşı Mübarizə Baş İdarəsində məsul vəzifədə çalışır.

Diqər korrupsiya ittihamı ilə həbs olunan Ağstafa Rayonunun İcra Hakimiyyətinin başçısı Nizaməddin Quliyevin oğlu da prokurorluqda çalışırdı. Lakin, Baş prokuror yanında Korrupsiyaya qarşı Mübarizə Baş İdarəsində çalışan Ramal Quliyev işdən çıxarılıb. Dekabrda Ağstafa Rayonunun İcra Hakimiyyətinin başçısı Nizaməddin Quliyev və birinci müavini, YAP yerli rayon təşkilatının sədri Ramiz Tatarov Dövlət Təhlükəsizlik Xidmətinin (DTX) əməkdaşları tərəfindən həbs edilmişdilər.

Sabiq başçı Nizaməddin Quliyev Goranboy rayonunda rəhbər olanda oğluna görə sahibkarlarla da problemi olub. Həmin zaman mətbuat səhifələrində yayılan məlumata görə, N.Quliyevə rayonda abadlıq işlərini tanınmış biznesmen Müqayis Verdiyevə gördürüb. Bu iş üçün sahibkarın 256 min manat xərci çıxsa da, başçı ona cəmi 100 min qaytarıb. M.Verdiyev qalan 156 min manatı almaq üçün bəzi qurumlara mətbuata müraciət etdikdən sonra onun başçı ilə münasibətləri pozulmuşdu. Daha sonra N.Quliyevin şirkətinin adından edilən dələduzluqla bağlı şikayəti əsasında iş adamı M.Verdiyev həbs edilsə də, sonradan məhkəmədə bəraət alaraq azadlığa buraxılmışdı. İddiaya görə, N.Quliyevin oğlu Ramal bankda işləyərkən yarım milyonluq yeyintiyə yol veribmiş və bu zərərin ödənməsində başçıya goranboylu sahibkar M.Verdiyev maddi yardım edib. 

Samux rayonu icra başçısı Alı Qocayevin oğlu Mehman Qocayev da prokurorluq orqanlarında “çalışır”. Lakin, qanuna görə o, işdən çoxdan azad olunmalı idi. Sosial mediada uzun müddətdir müzakirələr davam olunur ki, milli qanunvericilik dövlət qulluğunda çalışan şəxslərə biznes fəaliyyəti ilə məşğul olmağı qadağan edir. Belə ki, Bakı şəhər prokurorunun müavini Mehman Qocayev dövlət qulluğunda çalışdığı dövrdə aşkar biznes fəaliyyəti ilə məşğul olur. Buna görə prokurorluq orqanlarında gülməli vəziyyət yaranıb. Bakı şəhəri prokurorun müavini Azərbaycandan kənarda rəsmi iş adamıdır və təkcə Turkiyədə 20 milyonluq sərmaye etdi. Orada o məşhur otelin rəsmi menejeri idi. Araşdırmaçı jurnalist Hafiz Babalı yazıb ki, M.Qocayev “Sianji Enerji Turizm İnşaat Yatırım Sanayi ve Ticaret Anonim Şirketi”-nin qurulmasında 50% pay ortaqlığı ilə iştirak edib. (ünvan “Sianji Enerji Turizm İnşaat Yatırım Sanayi ve Ticaret A.Ş.” İstanbulda Sefaköy Tevfik Bey Mah. 20 Temmuz Cad. No.40-2 Küçükçekmece)

Bu şirkətdə onun ortaqları Türkiyədə və ondan kənarda Sianji Hotels otellər şəbəkəsinə sahib olan Çakır ailəsi idi. 2017-ci ilin martında 3 illik fəaliyyəti dövründə daim zərərlə işləyən şirkətin ləğv edilməsi barədə qərar verilib. Bu dövrdə Mehman Qocayev və Ökkaş Recai Çakır şirkətin baş direktoru vəzəfisində bir-birlərini əvəz ediblər. Türkiyədə bu qrup Erqenekonçu qrup kimi tanınır. “Prokuror” Mehman Qocayev həmin dövr ərzində həmin şirkətdə bir necə qalmaqalla tanınıb. M. Qocayevin Samuxda da böyük maldarlıq biznesi var.

Bu adamların çox böyük maddi imkanları var. Axı dövlətdən, prokurorluqdan maaş, sosial təminat almaqları nə dərəcədə düzgündür? Üstəlik də, başqalarının yerlərini tuturlar…