“Bakı” kafesindəki qətlin təfərrüatı: iki qrup üz-üzə... - ARAŞDIRMA

Sankt-Peterburqun Şlisselburq rayonunda yerləşən “Bakı” kafesində fevralın 25-də axşam baş vermiş silahlı "razborka”ya görə 5 nəfər tutulub.
Anaxeber.info Virtualaz.org-a istinadla xəbər verir ki, polis azərbaycanlılar arasında baş vermiş həmin qanlı hesablaşmanın səbəblərini də açıqlayıb.
Həmin insidentdə bir azərbaycanlı aldığı güllə yarasından ölüb. Rusiya DİN-in Leninqrad vilayəti üzrə daxili işlər idarəsindən verilən məlumata görə, həmin gün axşam bir-birinə düşmən olan iki azərbaycanlı qruplaşma arasında kafedə görüş olub. Görüşdə məqsəd bazarda nüfuz bölgüsünü və iqtisadi məsələləri müzakirə etmək idi. Lakin diskussiya heç də dinc keməyib, hesablaşma silahlı qarşıdurmaya çevrilib və iştirakçılardan biri aldığı güllə yarasından ölüb. Digəri ağır yaralanıb.
Öldürülən şəxs Lənkəranın Hirkan qəsəbəsinin sakini olan 39 yaşlı Qabil Rəşidovdur. O, son vaxtlar Peterburqun Soldat Korzun küçəsində yaşayırmış. Yaralanan şəxsin isə 34 yaşı var, güllə onun qabırğasından dəyib. Həmyerliləri onu həmin vaxt təsadüfən yaxınlıqdakı mağazaya gələn kuryerin köməyi ilə xəstəxanaya çatdırıblar. Kuryer yaralını Canelidze adına xəstəxanaya çatdırdıqdan sonra hadisə haqda polisə məlumat verib.
Hesablaşmada cəmi 60-a yaxın adam iştirak edib. Polis bunu ötən əsrin 90-cı illərində Peteburqda kriminal qruplaşmalar arasında baş vermiş qanlı hesablaşmalarla müqayisə edir. Sonradan hesablaşmanın 20-yə yaxın iştirakçısı tutulub, onlardan 5-i barəsində həbs qərarı verilib. Həmin “beşliyə” qarşıdurmanın baş verdiyi “Bakı” kafesinin sahibi də daxildir.
“Onların hamısı Qafqaz əsillidirlər, 4-nün Rusiya vətəndaşlığı var. Saxlanılarkən onlardan bir neçə vahid odlu silah da götürülüb”, -polis bildirib.
Polis həbs olunanların evlərində axtarışlar aparıb və bütöv silah arsenalı aşkar edib. Qətl, qanunsuz odlu silah saxlama və gəzdirmə, silah tətbiqi ilə müşaiyət olunan xuliqanlıq maddələri ilə qaldırılmış cinayət işi çərçivəsində aparılan axtarış zamanı şübhəlilərin evlərindən “Kalaşnikov” avtomatları, tapançalar və onlarla qutu patron, doldurulmuş güllə sandıqçaları tapılıb. Polis axtarışın görüntülərini yayıb.