“Biz soyuq müharibə dövründə səkkiz ABŞ prezidentinin qaçmaq istədikləri xoşagəlməz perspektivlə qarşılaşa bilərik”
“Ukraynadakı müharibə uzansa, Gürcüstan və Azərbaycan da öz ərazilərini geri qaytarmağa çalışacaq”
Kremlin Ukraynanın işğal edilməsi planına uyğun olaraq Rusiya qoşunları paytaxt Kiyevi üç-dörd günə, ölkənin qalan hissəsini isə bir həftə ərzində tam nəzarətə götürməliydi. Vladimir Putin qarşısına qoyduğu bu məqsədə nail ola bilmədiyini görüb, ilkin niyyətindən əl çəkmək məcburiyyətində qaldı.
Hazırda Putin Donbasın və Ukraynanın cənub rayonlarının işğalı ilə kifayətlənmək istəyir. Lakin gözləniləndən uzun sürən müharibənin geniş analizi göstərir ki, əgər hadisələr bu cür davam edərsə, son nəticədə Ukrayna qalib gələcək. Analitiklərin fikrinə görə, vəziyyətin hədsiz dərəcədə dramatikləşdirilməsinə və mühribənin Rusiya-NATO müstəvisinə daşınmasına ehtiyac yoxdur.
“AzPolitika.info” xəbər verir ki, Böyük Britaniyanın “The Guardian” qəzeti “Ukrayna artıq qalib gəlir: nüvə müharibəsi riskinə getmədən qələbə qazanmaq mümkündür” başlıqlı məqaləsini sözügedən mövzuya həsr edib. Həmin məqaləni təqdim edirik:
”Ukrayna Rusiya təcavüzünə qarşı müharibədə Qərbin müəyyən yardımı ilə qələbə qazanır. Rusiyanın başlıca məqsədi Kiyevi zəbt etmək və Ukrayna hökumətini devirmək idi, lakin bu plan tam uğursuzluğa düçar oldu. Hazırda Rusiya ordusu yenidən qruplaşır və onun əsas planı Donbas regionunun bütün ərazisini işğal etməkdir.

Müharibənin gedişində Rusiyanın elit hərbi birləşmələri xeyli itkilər verib və təkcə nisbətən böyük şəhər olan Mariupolun alınmasına iki aydan çox vaxt sərf edilib. Ona görə də Rusiya ordusunun Odessa kimi şəhəri ələ keçirməsi qətiyyən inandırıcı görünmür. Ehtimal edilir ki, Kreml bundan sonra müdafiəyə çəkilib atəşkəs və sülh danışqları təkilf edə bilər.
Putin rus xalqına Donbasdan əlavə ərazilər qoparılmasını böyük qələbə kimi təqdim edəcək və deyəcək ki, Qərb bununla razılaşmalıdır. Ancaq əsl həqiqətdə bu müharibə hərbi, siyasi və mənəvi cəhətdən Rusiya üçün fəlakətdir.
Rusiya ordusunun nüfuzu düşüb, ölkə iqtisadiyyatına güclü ziyan dəyib, Avropa Birliyi ölkələri inanılmaz sürət və qətiyyətlə özlərinin Rusiya neftindən asılılıqlarına son qoymaq istəyirlər. Onlar çox yaxın gələcəkdə Rusiya təbii qazından da birdəfəlik yaxa qurtarmağa hazırlaşırlar. Ona görə də Rusiya gələcəkdə təbii qazını satmaq üçün Çindən asılı vəziyyətə düşəcək. Bu isə rusların Çindən siyasi cəhətdən asılılığına gətirib çıxaracaq.

Rusiyanın məğlubiyyətinin geniş nəticələri nədən ibarətdir?
Əvvəla, əsas məsələ Ukraynanın müstəqilliyi və Qərbə istiqamətlənməsidir. Ukrayna bu məsələdə artıq qalibdir. Burada müəyyən məqamlara diqqət etmək lazımdır ki, Rusiya Donbas bölgəsinin ərazisinin bir hissəsini hələ 2014-cü ildən zəbt etmişdi. Yəni, Rusiya indiki döyüşlərdə heç də Donbasdan çox torpaq qopara bilməyib.
İkincisi, əgər nə vaxtsa Rusiya gələcək təcavüz planlarını həyata keçirmək üçün Ukraynadan platsdarm kimi istifadə edəcəyini düşünürdüsə, indi artıq bu məsələ bitib. Rusiya ordusu öz sərhədindən 20 mil uzaqlıqda yerləşən şəhəri zəbt edə bilmirsə, o zaman onun NATO ərazisinə müdaxilə etməsi mümkünsüzdür.

Şübhəsiz ki, Rusiya Moldova, Gürcüstan və Qarabağdakı separatçıların mövqeyini dəstəkləmkdə davam edəcək. Əgər Ukraynadakı müharibə uzanacaqsa, o zaman Gürcüstan və Azərbaycan öz ərazilərini geri qaytarmağa çalışacaqlar. Nəticədə daha geniş və daha təhlükəli münaqişə yarana bilər.
ABŞ müdafiə naziri Lloyd Ostin bildirib ki, Ukraynadakı müharibə Rusiyanı elə zəiflətməlidir ki, o, digər ölkələrə hücum edə bilməsin. ABŞ və Böyük Britaniyadakı mühüm şəxslər deyirlər ki, Rusiya üzərində tam qələbə qazanması üçün Ukraynaya hərtərəfli kömək göstərməliyik.
Ukrayna Rusiyanı 2014-cü ildən indiyədək işğal etdiyi bütün torpaqlardan qovmalı və onun üzərində elə alçaldıcı zəfər çalmalıdır ki, Putin rejimi devrilsin.

Qərb cəmiyyətləri Rusiyaya qarşı tətbiq olunan sanksiyalardan özlərinin də əziyyət çəkməsinə baxmayaraq, Ukraynaya yardım üçün səfərbərlik nümayiş etdirirlər. Ukraynaya dəstək qanunidir və vacibdir, lakin bu, həm də təhlükəlidir.
Qərbin dəstəyi ilə Ukraynanın qələbəsi elə həddə çatar ki, Putin rejimi və Rusiyanın mühüm həyati maraqları ciddi təhlükə altına düşər. Belə olan təqdirdə Rusiya Fransa və Almaniyanı qorxutmaq və onlarla gizli separat sülh bağlamaq üçün NATO-nun Ukraynaya yolladığı Polşadakı silah tədarükü xəttinə zərbə endirər. Hadisələr bu cür cərəyan edərsə, NATO üzvü hücuma məruz qaldığı üçün ABŞ Ukrayna səmasını uçuşa yasaq zona elan edəcək. Həmçinin ABŞ Hərbi Hava Qüvvələri ukraynalıların quru qoşunlarına havadan dəstək verəcək. Bu təyyarələrin bəziləri Rusiya ərazisindəki batareyalardan açılan atəşlə düşürülə bilər.
Bu zaman ABŞ bu cür itkilərlə barışmayaraq, Rusiya ərazisinə hücum edərmi? Əgər edərsə, belə olan halda biz soyuq müharibə dövründə səkkiz ABŞ prezidentinin qaçmaq istədikləri xoşagəlməz perspektivlə qarşılaşacağıq. Bu, Rusiya və NATO-nun bir-birinin ərazisinə raket atması deməkdir.
Ona görə də ABŞ prezidentlərinin özlərini təmkinli aparmaları Sovet İttifaqına olan rəğbətdən yox, onların rasional məntiqindən və bu dəhşətli riskləri görmələrindən irəli gəlirdi. Qərbin köməyi ilə Rusiyanın artıq strateji məğlubiyyətlə üzləşdiyini nəzərə alsaq, anlaşılar ki, bu cür risklərə getməyin heç bir mənası yoxdur”.
V. Nəsibov
“AzPolitika.info”