Zaqatalada həyat iflic olub

Sentyabrın 4-dən 5-nə keçən gecə güclü külək və yağış Zaqatalada hərəkəti iflic edib.
Bu barədə virtualaz.org saytına Zaqatala sakinlər məlumat veriblər.
Sakinlər bildirdilər ki, güclü külək işıq xətlərini sıradan çıxarıb. Çoxillik ağaclar qırılaraq fərdi yaşayış evlərinin və obyektlərin üstünə aşıb. Nəticədə yüzlərlə ev ziyan çəkib. Dünən gecədən indiyədək rayona işıq və qaz verilmir.
Sakinlər dedilər ki, Zaqatalada indiyədək belə dağıdıcı külək müşahidə olunmayıb.
Zaqatala Rayon İcra Hakimiyyətindən isə bildiriblər ki, dəyən zərərin müəyyənləşdirilməsi üçün araşdırma aparılır. Yaxın saatlarda işıq və qaz xətlərinin verilişi bərpa olunacaq.
* * *
10:18

Sentyabrın 4-dən 5-nə keçən gecə ölkənin şimal-qərb bölgəsində - Zaqatala və Balakən rayonlarında güclü külək və yağış müşahidə olunub.
APA-nın verdiyi xəbərə görə, hər iki rayon mərkəzində və bir neçə yaşayış məntəqələrində güclü külək bir sıra yaşayış evlərinin və sosial obyektlərin dam örtüyünü uçurub, yol kənarında iri gövdəli ağacları aşırıb.
Ağacların qırılması səbəbindən hər iki rayonda elektrik naqillər sıradan çıxıb və bu səbəbdən rayon mərkəzləri daxil olmaqla bir neçə yaşayış məntəqəsinə elektrik enerjisinin verilişi dayandırılıb.
Hazırda Fövqəladə Hallar Nazirliyinin yerli qurumlarının nümayəndələri fəsadların aradan qaldırılması istiqamətində tədbirlər görür. Bölgədə qeyri-sabit hava şəraiti davam etməkdədir.