Çərşənbə günü Brüsseldə Azərbaycan və Ermənistan liderləri ilə görüşün yekununda Avropa Şurasının rəhbəri Şarl Mişel bəyanatla çıxış edib.

 “May ayında son görüşümüz zamanı razılaşdırıldığı kimi, bu gün mən Azərbaycan prezidenti Əliyevi və Ermənistanın baş naziri Paşinyanı qəbul etdim.

Bu formatda dördüncü müzakirəmiz idi. Müzakirələrimiz Cənubi Qafqazda baş verən son hadisələr və Aİ ilə hər iki ölkə arasında münasibətlərə yönəldilib.

Bizim fikir mübadiləsimiz açıq və məhsuldar keçdi və mən buna görə hər iki liderə təşəkkür etmək istərdim. Gündəliyimizdəki məsələlərin bütün spektrini nəzərdən keçirdik.

Sevindirici haldır ki, son görüşümüz zamanı əldə olunmuş razılaşmaların irəliləyişi istiqamətində bir çox addımlar atılıb.

Sülh razılaşması

Bu gün biz Ermənistan və Azərbaycan arasında dövlətlərarası münasibətləri tənzimləyən sülh müqaviləsinin təşviqi üçün əsaslı işi gücləndirmək barədə razılığa gəldik və xarici işlər nazirlərinə mətnlərin layihələrini hazırlamaq üçün bir ay ərzində görüşməyi tapşırdıq.

Humanitar məsələlər

Biz həmçinin humanitar məsələləri, o cümlədən minaların təmizlənməsi, məhbuslar və itkin düşənlərin taleyini ətraflı müzakirə etdik.

Prezident Mişel erməni məhbusların azad edilməsinin Azərbaycan üçün vacibliyini vurğulayıb. Aİ bu məsələlərlə məşğul olmağa davam edəcək.

Sərhəd məsələləri

Biz sərhədlərin delimitasiyası ilə bağlı bütün məsələlərdə irəliləyişi nəzərdən keçirdik və sabit vəziyyətin ən yaxşı formada təmin edilməsi yollarını aradıq.

Biz razılaşdıq ki, sərhəd komissiyalarının növbəti iclası noyabrda Brüsseldə keçirilsin.

Rabitə

Nəqliyyat əlaqələrinin blokdan çıxarılması şərtlərinin müzakirəsinin gedişi ilə tanış olduq.

Bütün bu müzakirələrdə vurğulamaq istərdim ki, hər iki tərəfin əhalisini uzunmüddətli davamlı sülhə hazırlamaq vacibdir.

İctimai mesajlaşma bu baxımdan həlledici əhəmiyyət kəsb edir - belə incə bir şəraitdə ictimai yerlərdə deyilən hər bir söz qarşı tərəf tərəfindən açıq şəkildə eşidilir və ölçülür.

Aİ uzunmüddətli davamlı sülhə dəstəyini daha da gücləndirməyə hazırdır. Aİ həm də hər iki ölkənin və onların xalqlarının rifahı naminə daha sürətli iqtisadi inkişafa təkan verməyə davam edəcək.

Biz noyabrın sonuna qədər bu formatda yenidən görüşməyə razılaşdıq”, - Mişel açıqlamasında bildirib.

Brüsseldəki mənbələrin məlumatına görə, görüş 4 saat davam edib.

Ermənistan hökumətinin mətbuat xidmətinin məlumatına görə, Sərhədin Delimitasiyası və Təhlükəsizliyi Komissiyasının növbəti iclası da noyabrda Brüsseldə keçiriləcək.

Qeyd edək ki, bu, analoji formatda sayca dördüncü görüş idi. İlk görüş 14 dekabr 2021-ci ildə, ikinci görüş 6 aprel 2022-ci ildə, üçüncü görüş isə 23 may 2022-ci ildə keçirilib. -

Bakı/31.08.22/Turan: