Natiq Cəfərli: “Müəllimləri seçki proseslərindən tam ayırmaq lazımdır”

Natiq Cəfərli: “Müəllimləri seçki proseslərindən tam ayırmaq lazımdır”

“Yaponiya və Cənubi Koreya iqtisadi möcüzəsinin təməlini müəllimlər inşa etdilər. Günü bu gün də Yaponiyada ən nüfuzlu peşələrdən biri məktəb müəllimidir – dərs deməyə yeni başlayan müəllimlər 5900 manat maaşla (manat ekvivalentində xarici valyuta – red) işə qəbul olunurlar, məktəb müəllimlərinin orta maaşı 6985 manatdır, stajı 10 ildən çox olanların maaşı isə 8325 manatdan başlayır”.

Bunu Respublikaçı Alternativ Partiyasının (REAL) icra katibi, iqtisadçı Natiq Cəfərli “Facebook” sosial şəbəkəsində yazıb.

İqtisadçı qeyd edib ki, Cənubi Koreyada isə məktəb müəllimlərinin maaşı 4145 manatdan başlayır və hər staj ilinə görə artır.

O əlavə edib ki, Azərbaycanda məktəb müəllimlərinin sayı 140 min nəfərə yaxındır.

Onlardan 4439 nəfərin dərs yükü həftəyə 6 saat, maaşları 150 manatdır, 100 minə yaxın müəllimin dərs yükü isə 12-18 saat arasıdır, maaşları 400-600 manat arasıdır.

35561 müəllimin dərs yükü isə həftədə 18-24 saat arasıdır, onların maaşı isə 800-1000 manat arası dəyişir:

“Ölkədə məktəb müəllimlərinin orta aylıq maaşı 605 manat təşkil edir. İstənilən ölkənin gələcəyinin təməli məktəbdə, təhsildə inşa edilir. Amma təhsil o vaxt effekt verir ki, iqtisadiyyatın tələblərini ödəsin, yəni, təhsilin əsas sifarişçisi məhz iqtisadi model olmalıdır, bunun üçün isə azad və rəqabətli iqtisadi modelə ehtiyac var, azad və rəqabətli iqtisadi model isə ədalətli məhkəməsiz mümkün deyil”.

Cəfərli hesab edir ki, müəllimləri seçki proseslərindən tam ayırmaq lazımdır: “Ədalətli məhkəmə qurulması üçün isə normal seçkilərə ehtiyac var. Seçkiləri isə elə müəllimlərin əli ilə saxtalaşdırırlar. Deməli, müəllimlər bu işdə iştirak etməklə elə öz maaşlarını, qazanclarını kəsirlər. Ümumiyyətlə, müəllimləri seçki proseslərindən tam ayırmaq lazımdır, bu onların nüfuzuna da, ölkənin gələcəyinə də zərbə vuran amildir”.

5 oktyabr – Beynəlxalq Müəllimlər Günüdür.

YUNESKO-nun (UNESKO) qərarıyla 1966-cı ildən qeyd edilir.

Azərbaycanda Beynəlxalq Müəllimlər Günü 1993-cü ildən qeyd olunur.