Mediada heç kim fikir vermədi, amma Prezident Vladimir Putin ötən gün deyib ki, kimlərsə “Türk axını”nı dağıtmağa, qaz nəqlini dayandırmağa çalışıb.

Axar.az xəbər verir ki, bunu Serbiya Prezidenti Aleksandar Vuçiç deyib.

Vuçiç Daxili İşlər Nazirliyi və xüsusi xidmət orqanlarını ölkənin qaz nəqli sisteminin təhlükəsizliyini gücləndirməyə çağırıb:

“Bu baş versəydi, bilmirəm nə edərdik. Bu, işıqsız qalmağımız demək olardı. Novi Sad, Zrenjanin və Pançevoda qazla işləyən elektrik stansiyaları fəaliyyət göstərməyəcəkdi”.

Vuçiç əlavə edib ki, təkcə Belqrad gündə 3 milyon kubmetr qaz istehlak edir.

Qeyd edək ki, ötən gün Rusiya Prezidenti Vladimir Putin Təhlükəsizlik Şurasının daimi üzvləri ilə iclasda Kiyev rejiminin “Türk axını” qaz nəqli sisteminin kəmərlərindən birini partlatmağa cəhd etdiyini iddia edib.