Ehsan qadağası Təzəpirdə pozuldu

Məlum olduğu kimi, son günlər Azərbaycanda israfçılığın qarşısını almaq məqsədilə dövlət hüzr mərasimlərində ehsan verilməsini xüsusi nəzarətə götürüb.Yeni təşəbbüs cəmiyyətin müxtəlif təbəqələri tərəfindən dəstəklənib və rayon icra hakimiyyətlərində də hüzrdə ancaq çay, halva və xurma verilməsinə nəzarət etmək üçün xüsusi komissiyalar yaradılıb.
Bu gün Təzəpir məscidinin mərasim zallarından birində baş tutan hüzr mərasimində iştirak edən millət vəkillərindən biri “Qafqazinfo” ya maraqlı informasiya verib. O bildirib ki, Təzəpirdə Dəmiryolu İdarəsinin rəis müavini Əlirza Süleymanovun qardaşının 40 mərasimində iştirak edib və təqdirəlayiq haldır ki, mərasimdə yeni qaydalara əməl olunub. Yəni, mərasim işçtirakçılarına halva, çay və xurma verilib.
Adının çəkilməsini istəməyən deputat həmin gün başsağlığı vermək üçün Təzəpirdə keçirilən başqa bir hüzr mərasimində də iştirak etdiyini əlavə edib. Onun sözlərinə görə, tanınmış bir ailənin - Səfərbərlik xidmətinin sabiq rəis müavini Ramiz Məmmədovun il mərasimi idi. Hüzrdə 500 qadın və kişiyə ehsan verilib. Qaydalara zidd olaraq, süfrəyə salat, plov və s. qoyulub. Bundan xəbər tutan televiziya jurnalistləri çəkiliş aparmaq üçün məscidə gəlsələr də, mühafizəçilər çəkilişə qadağa qoyublar: “Həmin gün məsciddə baş tutan bir neçə məclisdə də eyni hal müşahidə olundu. Yeni qaydaları xatırlatdıqda isə məsciddən bizə bildirdilər ki, biz buna qarışa bilmərik. Yaxşı olardı ki, bu qayda məscid tərəfindən də nəzarətə götürülsün”.