Sayt məhkəmə hakimiyyəti orqanının qətnaməsini icra edib, “araz.az” saytı üzr istəyərək təkzib verib

“Bakı Metropoliteni” QSC-nin cavabdehlər Şixəliyev Fikrət Sərvər oğlu, Abdullayev
Nazim Mədət oğlu, Mustafayev Hüseyn Əziz oğlu, Əhmədova Nüşabə Bəyoğlan qızı, Rzayev
Asif Mirzə oğlu, Zeynalov Akif Mehdi oğlu, Yunusov Bəxdiyar İzzət oğluna qarşı işgüzar
nüfuzun müdafiəsi tələbinə dair iddia ərizəsinə Bakı şəhəri Sabunçu rayon Məhkəməsində
baxılmış və məhkəmənin 2019-cu il noyabr ayının 22-də imzalanmış 2(008)-2400/2019 saylı
qətnaməsi ilə “araz.az” internet saytının təsisçisi və baş redaktorunun üzərinə iddiaçı “Bakı
Metropoliteni” QSC-nin işgüzar nüfuzuna ciddi xələl gətirən, həqiqətə uyğun olmayan
məlumatları rəhbəri olduğu “araz.az” internet saytında yaydığına görə “Bakı Metropoliteni”
QSC-dən yazılı şəkildə “araz.az" saytında yerləşdirilməklə üzr istənilməsi və həmin saytda
04.05.2018-ci il tarixdə yerləşdirilmiş “Bakı metrosunda korrupsiya trenajoru” başlıqlı məqalədə
həqiqətə uyğun olmayan məlumatların təkzib olunması, təkzibin həmin məqalələrin yığıldığı
şriftlə və “Təkzib” başlığı altında yerləşdirilməsi vəzifəsi qoyulmuşdu.
“araz.az” internet saytının təsisçisi və baş redaktoru Hüseyn Əziz oğlu Mustafayev Bakı
şəhəri Sabunçu Rayon Məhkəməsinin 22.11.2019-cu il tarixli 2(008)-2400/2019 saylı qüvvəyə
minmiş qətnaməsinin icrasını təmin edərək, “araz.az” internet saytında “Bakı Metropoliteni”
QSC-nin işgüzar nüfuzuna ciddi xələl gətirən həqiqətə uyğun olmayan məlumatları yaydığına
görə təəssüf hissi keçirdiyini ifadə etməklə “Bakı Metropoliteni” QSC-dən üzr istəyib, “araz.az”
saytında 04.05.2018-ci il tarixdə yerləşdirdiyi “Bakı metrosunda korrupsiya trenajoru” başlıqlı
məqalədə yer almış məlumatların həqiqətə uyğun olmadığını təsdiqləməklə təkzib verib.
“Bakı Metropoliteni” QSC daim ictimaiyyətə açıq olduğunu bildirir və bir daha kütləvi
informasiya vasitələrinə müraciət edərək, paytaxtın ictimai sərnişindaşıma nəqliyyatı sektorunda
xüsusi çəkisi olan, bu səbəbdən sərnişinlər arasında əsassız narahatlıq və təşviş yaradan
məlumatların dəqiqləşdirilmədən, müəssisənin rəsmi münasibəti öyrənilmədən yayılmamasını,
bununla metropolitenin çoxminlik zəhmətkeş kollektivinin və rəhbərliyinin əməyinə kölgə
salınmasına və nüfuzuna xələl gətirilməsinə yol verməməyi xahiş edir.

Dərc edilmiş təkzibin tam mətninə istinad: http://araz.az/index.php/dizh-r/saenin-
statusun/8-guend-m/9893-t-kzib