YAĞLI VƏ DELİKATES GÖMRÜK BALIĞI - GÖMRÜK GENERALI NEHRƏMLİ KƏNAN!

DTX-nın "Qara maskalılar"ının son aylarda keçirdiyi və 5 rayonun icra hakimiyyəti başçısının həbsiylə nəticələnən əməliyyatlar ictimaiyyət tərəfindən heç də birmənalı qarşılanmır. Kimiləri bunu dövlətin möhkəmləndirilməsi adına mühüm addımlar hesab edir, hətta "qara maskalılar"a qurtarıcı, ağ atlı oğlan olaraq baxırlar. Bir başqa kəsim isə bunu mövcud kritik durumla bağlayır, hətta əməliyyatların həbs olunanlarla qarşılıqlı razılıq əsasında gerçəkləşdirildiyini söyləyirlər. Yəni, onu demək istəyirlər ki, hakimiyyətin yuxarı eşolonu çətin vəziyyətdə olan narazı kütləni razı salmaq məqsədilə bu cür siyasi şoular təşkil etmək məcburiyyətindədi.
Teref.az yazır ki, Elçin İlqaroğlu öz məqaləsini bu cümlələrlə başlayır. Məqaləsini davam etdirən Elçin bəy yazır:
Şəxsən mən məsələyə hər iki baxış bucağından baxanların ortaya qoyduğu iddialarla bu və ya digər dərəcədə razıyam. Elə, ya da belə bəzi icra başçılarının rüşvət və korrupsiyaya uğradıqları səbəbiylə həbs olunmaları təqdirəlayiq haldı və alqışlanmalıdı. Ancaq problemin həlli bir neçə icra başçısının həbsiylə mümkün deyil. Buna yalnız siyasətdən baş çıxarmayan, sıradan obıvatel inana bilər. Əgər iqtidar komandası rüşvət və korrupsiyaya qarşı mübarizə başlatdığı fikrində səmimi olduğunu ortaya qoymaq istəyirsə, görülən işlərlə kifayətlənməyib, problemi kökündən həll etmək yolunda addımlar atmalıdı.
Əgər DTX-nın məlum əməliyyatlarını obrazlı şəkildə "balıq ovu" kimi təsəvvür etsək, o zaman ortaya belə bir tablo çıxır: indiyə qədər ovlananlar yalnız kiçikçaplı kilkələrdi! Bir tək Vilyam Hacıyevi kilkədən bir az böyük, məsələn, deyək ki, sazan balığı (kiçikölçülü sazanlardandı) ilə müqayisə edə bilərik. Halbuki Azərbaycan adlı varlı dənizdə nə qədər desən dadlı və delikates hesab olunan, daha böyük ölçülü balıqlar var: nərəkimilər - çökə, bölgə, belyuqa, sivriyuqa, asetrin; bundan başqa, kütüm, farel, sazan, naqqa və onlarca digər yağlı və ətli balıqlar...
Hesab edirəm ki, DTX artıq kilkə ovundan ətli, yağlı və delikates balıqların ovuna keçməlidi. Kim deyə soruşsanız, konkret ad çəkə bilərəm: məsələn, NEHRƏMLİ KƏNAN kimi tanınan Kənan Məmmədov - Bakı Baş Gömrük İdarəsinin rəisi, Gömrük Xidməti generalı Kənan Məmmədov!
Kimdir bu nehrəmli Kənan? Bəzən mediya sensasiya yaratmaq xatirinə, bəzən də yanlışlıqla dəqiq olmayan informasiyalar yayır. Kənan Məmmədova "nehrəmli Kənan" ləqəbinin verilməsi məhz bu iki faktorun birindən qaynaqlanır. Əslində Kənan Məmmədov Nehrəm kəndindən deyil, bu, dəqiqdi. Səhv eləmirəmsə, Naxçıvan şəhərində doğulub. Ancaq fərq etməz, korrupsioner və rüşvətxorun nə milləti olur, nə vətəni. Şəxsən mənim üçün də bir o qədər fərq etmir ki, Kənan mənim həmyerlimdi, Nehrəmdə və ya Naxçıvanda doğulması da bir o qədər fərq etmir. Mənim üçün o, sıradan korrupsioner və rüşvətxordu və haqqında dərhal ölçü götürülməli, qoluna qandal vurulmalı və bütün bunlar bütün ölkəyə nümayiş olunmalıdı.
İrad tutula bilər ki, təqsirsizlik prezumpsiyasına görə Kənana rüşvətxor və korrupsioner demək yanlışdı. Əvvəla, mövcud şəraitə görə, Azərbaycanda təqsirsizlik prezumpsiyasının keçərsizliyini hər kəs bilir. Hər kəs onu da bilir ki, Kənan və onun kimilər, ortada dəlil və sübut olmadan da, rüşvətxor və korrupsioner kimi tanınırlar. İkincisi, ortada kifayət qədər faktlar var. Mən həmin faktlardan yalnız ikisini burda qeyd edirəm:
1) Kənan Məmmədov indiyə qədər bir çox Gömrük idarələrində ("Sınıq Körpü", Biləsuvar, Yalama və s) mühüm vəzifələr tutub. Bu illər ərzində törətdiyi əməllərə görə bir dəfə sərəncama götürülmüş, Yalamada (Xaçmaz Gömrüyündə) işlədiyi zaman isə gömrük nəzarətindən kənar küllü miqdarda qaçaq pul keçirdiyi səbəbilə gömrük orqanlarından uzaqlaşdırılmışdı.
2) Kənan Məmmədov gömrük orqanlarından uzaqlaşdırıldıqdan sonra məhz Səfər Mehdiyevin yardımı və "krışalığı" sayəsində yenidən gömrük xidməti işinə bərpa olunmuş, qısa müddət sonra isə Bakı Baş Gömrük İdarəsinin rəisi vəzifəsinə gətirilmiş, ona general rütbəsi verilmişdir. Elə bundan sonra Kənanın əsas qanunsuzluqları daha ölçüyəgəlməz və dözülməz olmuşdur. Onun "Aztexnika" MMC ilə məhkəmə prosesinin nəticəsi nə qədər saymazyana və qanunları heçə sayan biri, həm də rüşvətxorluğunu ortaya qoyan faktdır. Adam o qədər harınlayıb ki, məhkəmə qərarını belə heçə sayır, "burda mənəm, başımın üstündə Səfər Mehdiyev, Bağdadda isə kor xəlifə" prinsipi ilə hərəkət edir. Təkcə bu iki fakt Kənanın qollarına qandal vurulmasına yetər də, hələ artıq da olar.
Azərbaycan Respublikasının 13 iyun 2013-cü il tarixli "Gömrük Tarifi haqqında" Qanununun 12-ci maddəsində gömrük dəyərinin müəyyən edilməsi üçün göstərilən 6 üsul gömrük rüsumu tutulmasının dəqiq mexanizmini ortaya qoyur. Ancaq Kənan Məmmədov bu qanunu heçə sayır və gömrük dəyərini özünün müəyyən etdiyini, iş adamları və şirkətlərin onun göstərdiyi qədər rüsum ödəyəcəyini dilə gətirir. "Aztexnika" MMC ilə məşhur məhkəmə çəkişməsi bu əməlinin nəticəsiydi.
Mən DTX-nın (niyə DTX yazıram bilirsiniz, çünki hazırda rüşvət və korrupsiya əleyhinə əməliyyatlar aparılması işini cənab prezident onlara həvalə edib) diqqət mərkəzinə onu da çatdırmaq istəyirəm ki, Kənan Məmmədovun göstərişi ilə Bakı Gömrüyündə "karandaş əməliyyatı" deyilən bir əməliyyat həyata keçirilir. Bu nə deməkdi? Gömrük bəyannamələrində qiymətlər bir qayda olaraq qələmlə deyil, sonradan pozaraq üzərində dəyişiklik etmək asan olsun deyə karandaşla yazılır. Bu "əməliyyatla" hər ay milyonlarla vəsait dövlət büdcəsindən yayındırılır.
Kənan Məmmədovun qanunsuz əməllərindən biri də "Mebel əməliyyatı" deyilən bir məsələdi. O qədər də uzaq olmayan keçmişdə Bakı Baş Gömrük İdarəsinin "İpək Yolu Terminalı"na 100-dən çox xarici istehsal olan mebel yüklü kamyonlar daxil olur. Bu yüklər "rastamoşka" olunarkən "saxlanc" (soxraneniya) deyilən əməliyyata baş vurulur. Bunun mahiyyəti ondan ibarətdi ki, yükü gətirən şəxs və yaxud firmaya "rastamoşka" rüsumunu sonradan ödəmək şərtilə malları terminaldan çıxarmasına və satışını təşkil etməsinə şərait yaradılır. Bu, müəyyən qədər iş adamlarına yardım və işini asanlaşdırmaq kimi başa düşülsə də, əslində maraq ondan ibarətdi ki, bu malların milyonlarla dəyərindəki gömrük rüsumları mənimsənilsin. Əslində, bəhs etdiyim "mebel əməliyyatı"nda rüsumlar qeyri-rəsmi olaraq iş adamlarından alınıb və mənimsənilib, sənəddə isə "saxlanc" kimi göstərilib.
Bir faktı da qeyd edim ki, həmin o mebellərin əhəmiyyətli bir hissəsinin Kənan Məmmədovun özünə aid olduğu da söylənilir. Onun Dərnəgüldə, erməni qəbirstanlığı deyilən ərazidə bir neçə iri mebel salonu olduğu söylənilir. Gömrük rüsumu ödənmədən gətirilən mebellərin satışı məhz o salonlarda gerçəkləşdirilir. Bu, həm vergidən yayınma, dövlət büdcəsinə ödənilməli olan rüsumların mənimsənilməsi, həm də bu işlə məşğul olan digər iş adamlarının hüquqlarının pozulması deməkdi ki, bundan böyük korrupsiya, bundan böyük cinayət yoxdu.
Nəzər diqqətə onu da çatdırmaq istəyirəm ki, "mebel əməliyyatı" vaxtilə DTX tərəfindən ciddi şəkildə araşdırılıb və yəqin ki, cənab Əli Nağıyev iri bölgə balığı Kənan Məmmədov haqqında ölçü götürməyi nə zamansa gerçəkləşdirəcək.
Son olaraq, qara maska geyinən "ağ atlı oğlanlar"ın nəzər diqqətinə onu da çatdırıram ki, icra başçılarının iş otaqlarına yerləşdirdikləri kameralardan bir-ikisini də "İpək Yolu Terminalı"na yerləşdirsinlər. O zaman görəcəklər ki, bu terminala gələn kamyonların təkcə möhürünü qırmağın qiyməti 300 manatdır. Yəni, iş adamı malını gətirir, gömrük bəyannaməsini təqdim edir və deyir ki, buyur, möhürü qır, malımı yoxla. Kənanın qoçuları isə 300 manatı almayınca yaxına da gəlmirlər. Hər gün yüzlərlə belə maşın daxil olur və hər birindən 300 manat pul yığılır. Təkcə möhür qırmaq işindən bir ayda bir milyondan çox pul yığılır.
Cənab Nağıyev! Cənab general, bax, bu cür iri cüssəli, yağlı və delikates balıqları tora salın! Bunu edin ki, vəziyyəti kritik olan ölkə əhlinin 90 faizinin yanan ciyərinə su çiləmiş olasınız! Bu kimi əməliyyatlar keçirsəniz, mənim kimi qəliz və barışmaz vətəndaşlarımız da sizlərin - iqtidarın yanında olar. Nə zamana qədər ki, yalnız məhəlli qoçular olan icra başçıları - kiçik kilkələrlə uğraşacaqsınız, sizlərin səmimiyyətinə heç kim inanmayacaq...
Teref. az olaraq adları çəkiən şəxs və qurumların mövqeyini işıqlandırmağa hazırıq!
Teref.az