Sizin Reklam Burada
Tel: 050 378-66-61 E-mail: [email protected]

Qaçqın və köçkünlər cəmiyyətimizin ən həssas təbəqələrindən biridir

30-05-2020, 18:18   

 



“Azərbaycanda öz doğma yurd-yuvalarından didərgin düşmüş qaçqın və məcburi köçkünlərə göstərilən həssas diqqət və qayğının heç bir ölkədə anoloqu yoxdur. Dövlətimiz tərəfindən yürüdülən balanslaşdırılmış demoqrafik siyasətin mərkəzində, digər soydaşlarımızla bərabər, birmənalı şəkildə qaçqın və köçkünlərin də vətəndaş məmnunluğunun təmin olunması prinsipi dayanır“. Bu sözləri ölkə Prezidenti İlham Əliyev və birinci xanım Mehriban Əliyevanın Respublika Günündə Qaradağ rayonunda məcburi köçkünlər üçün salınmış “Qobu Park-3” yaşayış kompleksinin açılışında iştirakı zamanı dövlətimizin başçısının açıqladığı fikirlərə münasibət bildirən Azərbaycan Respublikası Milli Məclisinin deputatı Kamaləddin Qafarov söyləmişdir.
Millət vəkili bildirmişdir ki, hamımıza yaxşı məlumdur ki, “Qobu Park-1”, “Qobu Park-2” və yeni istifadəyə verilən “Qobu Park-3” yaşayış komplekslərinin inşası Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə reallaşdırılmışdır. 2017-ci ildən Qaradağ rayonunun Qobu qəsəbəsində salınmağa başlayan yaşayış kompleksləri qısa müddət ərzində minlərlə qaçqın və məcburi köçkünün həyat və məişət şəraitinin yaxşılaşmasında həlledici rol oynamışdır. Ölkəmizdə qaçqın və məcburi köçkünlər üçün inşa edilmiş 111-ci qəsəbə olan “Qobu-3” yaşayış kompleksində 1336 ailə yeni, abad mənzillərdə yaşayacaqdır.
K. Qafarov bildirmişdir ki, “Qobu-3” yaşayış kompleksinin istifadəyə verilməsi zamanı qaçqın və köçkünlərin ürəyincə olmuş bir ilkə imza atılmışdır. Yəni ilk dəfə olaraq, məcburi köçkünlər üçün yeni inşa edilmiş yaşayış kompleksində iş yerlərinin açılması da təmin olunmuşdur. Qaçqınların və Məcburi Köçkünlərin İşləri üzrə Dövlət Komitəsinin “Xarı bülbül” xalçaçılıq və naxış emalatxanası layihəsi məcburi köçkünlərin məşğulluğunun artırılması, sosial rifahının daha da yaxşılaşdırılmasını təmin ediləcəkdir. Gələcəkdə genişləndirilməsi nəzərdə tutlan bu layihəyə il ərzində “Qobu Park-1”, “Qobu Park-2” və “Qobu Park-3” yaşayış komplekslərində, həmçinin Qaradağ rayonu ərazisində yaşayan 70 məcburi köçkün cəlb ediləcəkdir. Emalatxanalarda Qarabağa aid zərgərlik nümunələri də hazırlanacaqdır. Məhsullar yerli bazarla yanaşı, məcburi köçkünlərin əl işləri kimi xarici bazara da çıxarılacaqdır. Bundan başqa, biznes layihəsi çərçivəsində yumşaq, plastik oyuncaqlar və tekstil məhsullarının istehsalı müəssisəsində 40-dan çox iş yerinin yaradılması nəzərdə tutulur. Sterilizə olunmuş tibbi ləvazimatların istehsalı müəssisəsində isə tibbi heyət üçün üst geyimləri və kombinezonlar istehsal ediləcək. Burada 25 nəfər işlə təmin olunacaqdır.
Millət vəkili bildirmişdir ki, ötən il 5 min ailə mənzillə təmin olunduğu halda, bu il onların sayı təqribən 7-8 minə çatacaqdır. Qeyd olunduğu kimi, Heydər Əliyev Fondunun rəhbəri, Birinci vitse-prezident Mehriban Əliyevanın təşəbbüsü ilə salınmış yeni şəhərciklərdə ümumilikdə 3700 məcburi köçkün ailəsi yerləşdiriləcəkdir.
Son 20 il ərzində qaçqın və məcburi köçkünlərin yaşayış səviyyəsinin artırılması məqsədi ilə dövlət büdcəsindən 5,1 milyard manat vəsait ayrılmışdır. Həmin vəsaitin 2 milyard manatdan çox hissəsi məhz məcburi köçkünlərin mənzil şəraitinin yaxşılaşdırılmasına sərf edilmişdir. Bu müddət ərzində 300 mindən artıq məcburi köçkünün mənzil problemi həll olunmuşdur.
K.Qafarov demişdir ki, açılış mərasimi dövlətimizin başçısı cənab İlham Əliyevin Ermənistan –Azərbaycan Dağlıq Qarabağ münaqişəsi ilə bağlı son dövrdə müxtəlif paytaxtlarda, həmçinin ölkəmizin daxilində bir ovuç siyasətçinin tədavülə buraxdığı populist iddialara aydınlıq gətirməsi ilə də yadda qaldı. Cənab Prezident İlham Əliyevin burada səsləndirdiyi ciddi mesajlardan biri, məcburi köçkünlərin məskunlaşdıqları yaşayış komplekslərinin müvəqqəti xarakteri daşıması ilə bağlı oldu.
Digər tərəfdən, Prezidentimiz torpaqlar işğaldan azad olunandan sonra məcburi köçkünlərin geri qayıtmayacağı ilə bağlı radikal müxalifətin fikirlərinin cəfəngiyat olduğunu bildirərək, Cocuq Mərcanlıya möhtəşəm qayıdışı xatırlatdı və bildirdi ki, ortada bir nümunə olduğu halda, nə müxalifətin, nə də Ermənistan hakimiyyətinin sevinməsinə heç bir əsas yoxdur.
Millət vəkili sonda bildirdi ki, Azərbaycan Prezidenti cənab İlham Əliyevin Ermənistan rəhbərliyinə və siyasi elitasına səslənərək hazırda danışıqlar prosesinin mərhələli həll variantı üzərində getdiyini bəyan etdi və onları öz xalqını aldatmaqdan çəkinməyə çağırdı. Dağlıq Qarabağ problemindən bəhs edən dövlət başçısı vurğuladı ki, bu, tarixi məsələdir və birdəfəlik həll olunacaq: “Bizim məqsədimiz, əsas amalımız suverenliyimizi tam və birdəfəlik təmin etməkdir və biz bunu edəcəyik!”.
Facebook-da paylaş
Digər xəbərlər
Xəbərlər
Bütün xəbərlər
Ən çox oxunanlar