Rusiya Ermənistanı NATO-nun sammitində iştirakına görə hədələyib

“Yerevan öz əllərilə Cənubi Qafqazda ciddi şəkildə destabilləşdirmə riski yaradaraq, öz təhlükəsizliyinə zərər vurur”

Rusiya Ermənistanı NATO-nun Vaşinqtonda keçirilən sammitində iştirakına görə tənqid edib, Ermənistanın NATO və onun üzv dövlətləri ilə əlaqələrini dərinləşdirməyə yönəlmiş addımını “ehtiyatsızlıq” adlandırıb.

“OC Media” yazır ki, Rusiya xarici işlər nazirinin müavini Mixail Qaluzin “Moskva Ermənistanın 9-11 iyul NATO-nun Vaşinqtonda keçirilən sammitində iştirakına görə dərin təəssüf hissi keçirir”, – deyib.

Qaluzin əlavə olaraq Yerevanı NATO və onun üzv dövlətləri ilə “xüsusilə NATO standartlarının tətbiqi, silahların alınması və ya birgə döyüş hazırlığı fəaliyyətinin aparılması baxımından” əməkdaşlığı genişləndirməyi seçdiyinə görə tənqid edib.

“Məqsədi Rusiyanın “strateji məğlubiyyəti” olanlarla belə bir sürətlə əməkdaşlığı dərinləşdirməklə, Yerevan öz əllərilə Cənubi Qafqazda ciddi şəkildə destabilləşdirmə riski yaradaraq, öz təhlükəsizliyinə zərər vurur”, – Qaluzin əlavə edib.

Ermənistandakı bilikli mütəxəssislər və siyasətçilər belə “ehtiyatsız addımların” mümkün bədəlini başa düşürlər.

Rusiya xarici işlər nazirinin müavini həmçinin qeyd edib ki, Ermənistan KTMT-nin üzvü və çoxsaylı ikitərəfli hərbi sazişlərin iştirakçısı olaraq qalır.

O, həmçinin Rusiya Baş nazirinin müavini Aleksey Overçukun Avrasiya İqtisadi İttifaqı və Avropa İttifaqına üzvlüyünün “uyğunsuz” olduğu barədə Ermənistana etdiyi son xəbərdarlığa toxunub. Ermənistanın siyasi oriyentasiyasının getdikcə daha çox Qərbə yönəldiyini qeyd edib.

“Bir ölkənin Rusiyaya yaxın olmasından əldə etdiyi faydalar həm də təhlükəsizliyimiz və strateji dərinliyimiz üçün ödədiyimiz qiymət kimi qəbul edilməlidir”,- deyən Overçuk, “bölgədənkənar oyunçuların” Qafqaza daxil olmasının “nəticəsiz” qalmayacağı xəbərdarlığını da edib.

Qaluzin Yerevanın bu addımını “iki kresloda oturmaq” cəhdi adlandırıb.

Cümə günü başqa bir müsahibəsində Qaluzin Avropa İttifaqının Ermənistandakı missiyasını tənqid edərək, Rusiyanın onların fəaliyyətini “mənfi qiymətləndirməsini” qeyd edib və onların işlərinin “heç bir nəzərəçarpan nəticəsini” görmədiklərini bildirib.

“Biz həmçinin narahatıq ki, Yerevanın təsdiqi ilə missiya nəinki genişlənir, həm də müvəqqətidən daimiyə çevrilməklə hədələyir”, – Qaluzin əlavə edib. O, həmçinin qeyd edib ki, Kanada nümayəndələri aprel ayında missiyaya qoşulub: “Bu, faktiki olaraq NATO-nun Cənubi Qafqaza sürətlə nüfuz etməsi deməkdir”.

Qaluzin daha sonra Aİ-nin “Cənubi Qafqaz dövlətlərinin ənənəvi tərəfdaşlarının və qonşularının – Rusiya, İran və Türkiyənin maraqlarına zərər verərək”, regionda möhkəmlənməyə cəhd etdiyini vurğulayıb.

Cümə günü Ermənistan parlamentinin vitse-spikeri Akop Arşakyan Rusiyanın münasibətini qısa şəkildə şərh edib.

“Ermənistan və Ermənistanın təhlükəsizlik sistemi ilə bağlı bütün məsələlər Ermənistan hakimiyyətinin qərarları ilə həll olunur. Və hesab edirəm ki, qəbul edilən qərarlar Ermənistanın təhlükəsizlik maraqlarına əsaslanır”, – deyə Arşakyan bildirib.

O, həmçinin qeyd edib ki, Ermənistanın Rusiya ilə münasibətlərində davam edən problemlər, o cümlədən KTMT-nin fəaliyyəti, Ermənistanın təhlükəsizlik mühiti və razılaşmaların yerinə yetirilməməsi ilə bağlı həll edilməmiş suallar var.

Bu yazı ingilis dilindən tərcümə edilmişdir. Yazının əslini OC Mediadan oxuya bilərsiniz.