ABŞ Güləni Türkiyəyə verəcəkmi? CAVAB

“Xəbərləri görmüşük. Dövlət Departamenti Türkiyə hakimiyyətinin Fətullah Güləni ABŞ-dan tələb etməsi xəbərlərinə münasibət bildirə bilməz. Bu məsələ ilə bağlı ətraflı məlumatı Türkiyə hakimiyyətindən soruşmaq lazımdır”. Lent.az-ın “Hürriyət” qəzetinə istinadən verdiyi xəbərə görə, bu sözləri ABŞ Dövlət Departamentinin mətbuat katibi Cen Psaki Vaşinqtonda keçirdiyi mətbuat konfransında səsləndirib.

Qeyd edək ki, Türkiyədə nurçuların lideri, hazırda ABŞ-da yaşayan Fətullah Gülən haqqında “terror təşkilatına liderlik etmək” ittihamı əsasında həbs qərarı çıxarılıb.

Dekabrın 14-də həyata keçirilən əməliyyat zamanı Türkiyə polisi nurçuların media orqanlarının bəzi rəhbər və əməkdaşlarını, eləcə də bu cərəyanın nümayəndələri olan bəzi keçmiş polis rəislərini saxlayıb.

Fətullah Gülən 1999-cu ilin martından ABŞ-ın Pensilvaniya ştatında yaşayır.