Cinsi azlıq olan məşhurlarımız kimlərdir?-SORĞU

Sirr deyil ki, cinsi azlıqlar müasir cəmiyyətin böyük bir hissəsini təşkil edir. Bu, artıq danılmaz faktdır. Qərbdə belə insanların özlərinin əyləncə məkanları, klubları geniş yayılsa da, Azərbaycanda bu, “geylərin küçəsi”, “geylərin parkı” ilə məhdudlaşır. Ən yaxşı halda cinsi azlıqların hansısa klubda mərasimləri ola bilər.

İstənilən peşə sahibləri arasında homoseksuallar olsa da, ən məşhur cinsi azlıqlar şou-biznes, incəsənət sahəsinin insanlarıdır. Hətta bəzən onları bunu təbliğ etməkdə ittiham da edirlər.

Əbəs yerə deyil ki, homoseksualların ilham aldığı şəxslər də məhz şou nümayəndələridir. Məsələn, dünya pop musiqisinin kraliçası Madonna geylərin ikonası hesab olunur. O, bütün dünya geylərinin hüquqlarının müdafiəçisi hesab olunur.

Ledi Qaqa da Madonnadan geri qalmır. O, müsahibələrinin birində 2 oğlunun olmasını və hər ikisinin homoseksual olmasını istədiyini bildirib.

Rusiya şou biznesində isə Allah Puqaçova və Lyudmila Qurçenko gey ikona hesab olunurlar. İkinci dünyasını dəyişdiyindən, Puqaçova meydanda təkdir.

Türkiyə şou biznesində isə Ajda Pekkan və Sezen Aksu uzun illər gey ikona olub. İndi isə Hande Yener daha çox homoseksualların hüquq müdafiəçisi olaraq çıxış edir.

Yerli şou-biznesimizdə hələ rəsmən cinsi azlıq, homoseksual və ya geylərin ikonasını özəlləşdirən sənətçimiz yoxdur.

Tabloid.az yerli şou nümayəndələrinin cinsi azlıqlara münasibətini öyrənib.

“Onları insanlıqlarına görə sevirəm, gecə saat 12-dən sonra məşğul olduğu işlərə görə yox!”



Müğənni Roza Zərgərli: “Hər bir cildi, hər bir bədəni, hər bir beyini Allahın izni ilə bəndələr yaradıb. Dünyaya gələn insanın üzərində də Allahımız var. O, Allahsız bəndə deyil. Yaranıbsa demək ki, Allahın buna izni olub. O, öz həyatını necə seçirsə, gey, transseksual, lezbiyan… heç bir fərq etməz. Bu həyatı özü seçir. Və Allahın qarşısında o tək özü cavab verəcək. Onun yerinə Roza, nə də qeyri birisi cavab verməyəcək. Və biz yenə də dəqiq bilmirik, cavab veriləcək ya yox. Hal-hazırda o insan həyatını belə yaşayır. Cinsi azlıqlar Roma dövründən bəri olub. Makedoniyalı İskəndərdən tutmuş, Çingizxana kimi. Mənim dostlarım arasında cinsi azlıqların nümayəndələri var. Sözün əsl mənasında dostlarımdır. Mən bilirəm dar günümdə normal kişi və ya normal qadın gəlib mənə dayaq durmaz. Söz ilə dayaq böyük əhəmiyyət kəsb edir. Amma onlar dayaq dururlar. Mən də onlara dayaq duraram. Mən onları insanlıqlarına görə sevirəm. Onun gecə saat 12-dən sonra məşğul olduğu işlərə görə yox. Və yaxud da lezbiyan qadınlar olsun. Mən illərlə Riki Martindən kişi kimi zövq alırdım, enerji alırdım. Sonradan bildim ki, homoseksualdır. Buna görə Riki Martinə sevgim azalmadı. Bu, onun öz seçimidir. Düzdür, o, mənim bütün xəyallarımı puç etdi. Və ya rusiyalı müğənni Zemfira… onun oriyentasiyası mənim onu sevməyimə heç bir təsir etmir. Yəqin ki, valideynləri vaxtında uşaqlarına düzgün nəzarət etməyiblər. Biz heç birimiz yaxınlarımızın və ya uşaqlarımızın homoseksual olub – olmamasından sığortalanmamışıq. Mən bunun təbliğini aparanları dəstəkləmirəm. Amma heç kəsin də şəxsi işinə qarışmaq olmaz. Mən elə insanlara normal baxıram”.

“Məhəmməd peyğəmbərin dövründə də belələri olub…”



Müğənni Şölə Səfərəliyeva: “Mənə elə gəlir ki, cinsi azlıq sözü kökündən səhvdir. Onlar artıq azlıq deyil, əməlli başlı çoxluqdur. Deyəsən, belə gedişlə Allah tərəfindən yaradılan normal kişi və qadınlar azlıq olaraq qalacaq. Son illər müşahidəmdən deyə bilərəm ki, bu dəb halını alıb. Necə ki, bir ara dəb idi, soyunmasan səhnəyə çıxmayacaqsan. Daha çox oğlanlar indi istiqamətlərini dəyişirlər. Bununla da qızlarımız evdə qalır. Elə buna görə də, qızlar həmin bu sevgini öz həmcinsləri arasında axtarırlar. Azərbaycanda ailəli, kəbinli, ZAQS-lı olmayana yaxşı baxılmır. Mənim fikrimcə, bu cür qayda qanunlar olmasaydi, bu vəhşi ehtiraslar da ortaya çıxmazdı. Ən bariz nümunələrə isə “Torqoviy”da , elə küçənin ortasında da görmək mümkündür. Məhəmməd peyğəmbərin dövründə də belələri olub, tayfa şəklində yaşayıb. Amma sonradan onlar uzaqlaşdırılıb. İnsan homoseksual ola bilər. Əgər o, özünü normal biri kimi aparırsa, münasibətim normaldır. Təəssüf ki, Azərbaycanda homoseksuallar, xüsusilə də, oğlanlar özlərini o qədər açıb buraxırlar ki, bilmirsən ki, bu qadındır yoxsa kişi. Belə şeylərə çox aqressiv yanaşıram. Mütləq deyil ki, homoseksual kişi saç uzada, dırnaq boyaya və s. Xanımlarda isə kobudluğu heç qəbul edə bilmirəm. Ətrafımda da belə inşalar var. Elələri var ki, bunu içlərində gizlədir. Amma indi əksəriyyət bunu reklam edir. Bu, biabırçılıqdır. Mən belə övlad arzulamaram. Düzdür, heç kəs bundan sığortalanmayıb. Translardan isə mən qorxuram. Çox qorxunc görünürlər. Mən belə övlad anası olmaqdansa, sonsuz olmaq istəyərəm”.

“Belə şey olsa dəli olaram, havalanaram”



Müğənni Elnarə Xəlilova: “Mən Allahın yaratdığı heç bir kəsə radikal münasibət bəsləyə bilmərəm. Qəti deyə bilmərəm ki, münasibətim çox pis və ya yaxşıdır. Madonna və Ledi Qaqaya gəldikdə hər kəs bilir ki, onlar şeytandırlar. Onlar çoxdan Allahdan imtina ediblər. Allahın qoyduğu qayda-qanun var. Hamımız müəyyən dərəcədə riayət etməyə çalışırıq. Mən demirəm ki, mən ideal bəndəyəm. Amma cinsi azlıqlara mənim münasibətim necə yaxşı ola bilər. Axı mən anayam 2 oğlum, 1 qızım var. Belə şey olsa, dəli olaram, havalanaram. “Quran”da da yazılıb ki, kişi ilə kişinin cinsi əlaqəsindən 72 cür xəstəlik yaranır. Əgər bu sənin əlindədirsə, bunu dəyiş. Yox əgər Allah səni belə yaradıbsa, onu öldürsən də, döysən də, o, düzələn deyil. Bu artıq Allah ilə bəndə arasında olan bir işdir ki, ora da mən qarışmaq istəmirəm”.

“Allahın lənətlədiyi insanlar”



Müğənni Samirə Allahverdi: “Allahın lənətlədiyi insanlardır. Allahın əleyhinə getmək olmaz. Allah hidayət etsin olsun”.

“Mən nə tərəfkeşlik edirəm, nə də qarşıyam”



Müğənni Tünzalə Ağayeva: “İnsan olan bəndə yaradılışını unutmamalıdır. Kim necə yaşayırsa yenə də Allah qarşısında özü cavab verəcək. Mən belə şeyi müzakirə etməyi özümə haqq vermirəm. İnsana yaraşır insan kimi, əxlaq çərçivəsində yaşamaq. O çərçivəni sınıb keçirsə, birinci növbədə özünə zülm etmiş olur. Hər kəs öz yolunu özü seçir. Mən nə tərəfkeşlik edirəm, nə də qarşıyam”.

“Mən sonradan azğınlaşmış insanları qəbul etmirəm”



Müğənni Lalə Məmmədova: “Onların arasında da bölgü gedir. Biri var Allah tərəfindən kişi cismində amma bədənində qadın hormonları olan insanlar. Belələrinin günahı yoxdur. Allah onu belə yaradıb. Biri də var azğınlığından. Həyat ona çox şey verib, bunun da dadına baxım deyə sonradan yaranmış cinsi azlıqlar. Mən hesab edirəm ki, Allah tərəfindən belə dünyaya gələn insanların özlərindən başqa heç kəsə ziyanı dəymir. Siz baxın dünya tarixində, incəsənət tarixində həmin o cinsi azlıqların incəsənət verdiyi töhfələrə. İstər rəssamlar olsun, istər bəstəkarlar, istərsə də müğənnilər. Mən nə qədər ona pis baxsam da, onlar var. Mən sonradan azğınlaşmış insanları qəbul etmirəm”.

“Qadın qadın kimi, kişi də kişi kimi gözəldir”



Müğənni Rəşad İlyasov: “Allahın işidir. Madonna dünya musiqisinə öz sözünü diktə edən bir xanımdır. O, cümlədən də Ledi Qaqa. Onlarda bu adi haldir. Bu yaxınlarda onun bir şousuna baxdım. Madonna verilişlərin birində qonaq idi. Ona müxtəlif dünya ulduzlarının şəkillərini verdilər və o, həmkarlarını 1 sözlə ifadə etməli idi. Bir neçə xanıma “gözəl əndam” sözlərini dedi. Elton Conun şəklini verəndə yenə də “gözəl əndam” sözünü dedi. Onlar belə şeylərlə gündəm yaradırlar. Hər kəsin öz həyatı var. Kim necə istəyir eləcə də yaşayır. Amma mənə elə gəlir ki, qadın qadın kimi, kişi də kişi kimi gözəldir. Əgər bunlardan biri yerini dəyişirsə, tərs mütənasiblik yaradırsa, bu ifrat yaradır. Həm vizual, həm də mənəvi cəhətdən insana ağırlıq gəlir. Məsələn, Hollivudun yaşlı aktyorları, Corc Kluni, Şon Konnori kişi imici yaradıblar. Hər şey öz yerində olanda gözəldir. Qabilin də gözəl sözləri var “müsibət oluruq biz, səhv düşəndə yerimiz”. Nə sənət sahibi olursa olsun… Axı kişi qadın paltarında necə görünə bilər ? Mən təsəvvür edə bilmirəm. Kişi elə kişi paltarında daha yaraşıqlı görünür. Nəinki, qadın paltarında”.

“Gündəlik Teleqraf” MMC-yə daxil olmayan saytların istinadla olsa belə web-səhifəmizdəki yazı, foto və videoları tam, qismən və ya dəyişdirilmiş şəkildə yaymasına icazə verilmir.

Yenilik.Az: