Azərbaycanda yayılan H3N2 virusundan ölənlər var – Nazirlikdən açıqlama (YENİLƏNİB)

“Azərbaycanda yayılan virus H3N2-dir”.
Bu haqda Modern.az-a məlumat verən tanınmış həkim, professor Adil Qeybulla deyib ki, bu A virusunun bir formasıdır:

“Bu virus kifayət qədər ağır, kliniki gedişə malikdir. Həm yuxarı tənəffüs yolları infeksiyalarına, həm də yayılan qrip infeksiyasına “sezon qripi” deyirlər. Həmişə payız və qış fəsillərində bu cür hallar müşahidə olunur. Təbii ki, bu il virusa yoluxma halları daha çoxdur”.

Azərbaycanda epidemiyadır?..
Professor bildirib ki, virusun epidemiya olması barədə Ümumdünya Səhiyyə Təşkilatının (ÜST) rəsmi məlumatı olmalıdır:
“Amma məsələ burasındadır ki, bunun qrip epidemiyası olması barədə Ümumdünya Səhiyyə Təşkilatının (ÜST) məlumatı ortada yoxdur. Bu, sadəcə olaraq Rusiya və Azərbaycanda ortaya çıxan məlumatdır. Bu virusun yoxlanması üçün laborator müayinələrin nəticələri ortada yoxdur. Ona görə də, bəzi şeylər hələ də müəmmalı qalır”.

Qripə laqeyd münasibət ağır fəsadlara yol açır
Bununla belə həkim deyib ki, vətəndaşlar virusun hansı növünün olmasını gözləməli deyil:
“Səhiyyə Nazirliyinin laboratoriyalarında bu məsələlər həll olunmayıb. Ortaya hər hansı məlumat qoymurlar. Ümumiyyətlə, qripə qarşı Azərbaycanda həmişə sayğısız münasibət olur. Həmişə də onun əziyyətini insanlar çəkir. Bütün bunlara rəğmən, hər bir şəxs profilaktik tədbirlərini görməlidir”.

“Azərbaycanda H3N2 virusundan ölənlər var”
A.Qeybulla nazirlik tərəfindən rəsmi məlumat verilməsə də, hazırda yayılan H3N2 virusundan ölənlərin olduğunu istisna etmir:
“Keçən il də Azərbaycanda qripdən dünyasını dəyişən insanlar olub. Rəsmi statistikada öz əksini tapmasa da, bu fakt bizə məlum idi. Ağ ciyərin pnevmoniyası, yuxarı tənəffüs yollarının iltihabı, ağ ciyər ödemi kimi çox sayda xəstəliklər məhz qrip infeksiyası fonunda ağırlaşır, bəzən də ölümlə nəitcələnir. Builki virusdan da ölənlər var. Amma rəsmi olaraq açıqlanmır”.

Həkim qripin profilaktikası üçün aşağıdakıları məsləhət görüb:
1. Cuna maskalardan istifadə etməli (ictimai nəqliyyatda, işdə, kütləvi toplantı
yerlərində).
2. Şəxsi gigiyena tədbirlərinə riyaət etməli: əlləri tez-tez sabun və isti su ilə yumalı
(xüsusilə yeməkdən öncə);
3. Qapı dəstəyinə, sürahiyə, idarəetmə pultuna və s. əşyalara əl vurduqdan sonra
əlləri yumalı.
4. Vitaminoterapiya;
5. Virus əleyhinə vaksinasiya;

Qripə yoluxduqdan sonra:
1. Yataq rejiminə keçməli;
2. Çoxlu ilıq maye qəbul etmək;
3. Cuna maskalardan istifadə etməli;
4. İstifadə edilən dərmanlar: Antiqrippin, Amantadin, Remantadin, Arbidol,
Tamiflu, Relenza, Zanamivir. Bu dərmanlar virusun yayılmasına müqavimət
göstərir. Onları qrip əlamətləri başlayandan 48 saat sonra atmalı. Təcrübə göstərir
ki, onlar ağırlaşmaları azaldır və xəstəliyin ömrünü qısaldır.
5. Vitaminoterapiya;
6. Həkim təyinatı.

Nazirlik: A (H3N2) çox yüngül keçən mövsümi qripdir
“Azərbaycanda tək-tək hallarda A tipli qrip virusuna aid olan H3N2 aşkar olunur”. Səhiyyə Nazirliyinin Gigiyena və Epidemiologiya Mərkəzinin direktor müavini Afaq Əliyeva APA-ya deyib ki, bu gün insanlarda əsasən respirator virus infeksiyalarına xas olan adena virus, paraqrip müşahidə edilir. Onun sözlərinə görə, tək-tək hallarda A tipinə aid olan virus yoluxmaları olur və bu, mövsümi haldır: “Xəstəliyin ağırlaşmasına insanlar özləri səbəb olur. Xəstəlik ona görə ağır keçir ki, insanlar yataq rejimə riayət etmir, həkimə getmir, müalicə almırlar. Bu qaydalara riayət edilmədikdə xəstəlik ağırlaşır. Amma ilk əlamətlər olduqda həkimin dediyi təyinatla müalicə olunsa, həmin şəxslərdə xəstəlik yüngül keçir, heç bir ağırlaşma-bronxit, pnevmaniya olmur. Xəstəliyin ağırlaşmasına insanlar özləri səbəb olurlar. Xəstə insanlar işə davam edəndə, evdən çıxanda ətrafdakıların da yoluxmasına səbəb olur”.

A.Əliyeva qeyd edib ki, bu günə kimi nisbətən ağır respirator infeksiya keçirən xəstələrdən laborator müayinə üçün material götürülür və Respublika Taun Əleyhinə Stansiyanın laboratoriyasında müayinə olunur. Direktor müavini vurğulayıb ki, onların arasında bir neçə nəfərdə A tipli qrip virusuna aid olan H3N2 qeydə alınıb. Onun sözlərinə görə, H3N2 çox yüngül keçən mövsümi qripdir.

A.Əliyeva qeyd edib ki, Azərbaycanda insanların qripdən ölməsi ilə bağlı səsləndirilən fikirlər əsasızdır, indiyə kimi ölkədə qripdən ölən olmayıb.