Qaraçuxurlu – Rəşad Dağlıya Aygün haqda sözlərinə

Meyxanaçı Namiq Qaraçuxurlu həmkarı Rəşad Dağlının, “Namiqə görə Aygünə hörmətimiz var”- sözlərinə münasibət bildirib.
Ona verdiyi dəyərə görə həmkarına təşəkkür edir:

“Dünən “Maşın”realiti şousuna baxa bilməmişdim. Bu gün siz məlumat verəndən sonra “Youtube” kanalında izlədim. Bu haqda açıqlama verməyə lüzum görmürəm. Rəşada isə sözlərinə görə, minnətdaram. Ona böyük hörmətim var. Düşünürəm ki, bəzi gənc həmkarlarımız mədəniyyətdə, etikada Rəşaddan ibrət götürməlidirlər”.

Qaraçuxurlu əməkdar artist Elza Seyidcahanla ifa edəcəyi duetdən danışıb:

““Azərbaycanın səsi” müsabiqəsində Elza xanımla duet oxumaq haqda danışıqlar apardıq. İnanıram ki, duetimiz uğurlu alınacaq. Düzünü deyim ki, mahnı ilə tanış deyiləm. Mənim vaxtım olanda Elza xanımın, onun vaxtı olanda mənim vaxtım olmur. Hələ ki, görüşüb danışa bilmirik, amma planımızda duet oxumaq var. Düşünürəm ki, Elza xanım maraqlı, qeyri-adi duet hazırlayıb”.

Meyxanaçı Seyidcahanın “Bizim duetimiz Aygünlə Namiqin duetini kölgədə qoyacaq” sözlərinə də fikir bildirib:

“İnanmıram ki, Elza xanımla duetimiz Aygün-Namiq duetini kölgədə qoysun. Çünki Aygün-Namiq duetləri silsilə olub. Elza xanımla duetimizi silsilə duetlərimizlə qarşılaşdırmaq hələ tezdir. Lakin duetimiz Aygün-Namiq duetini kölgədə qoysa, çox sevinərəm. Elza xanımın bu fikrindən sonra inanıram ki, duetimiz daha uğurlu olacaq. Elza xanımın təcrübəsinə inanıram”.

Qafqazinfo