90 saylı seçki dairəsində qanun pozuntusu halları müşahidə edilir - Fotolar

Xəbər verdiyimiz kimi bu gün 90 saylı Ağdaş seçki dairəsi üzrə Milli Məclisə təkrar seçkilər keçirilir.

Musavat.com-un Ağdaşa ezam olunmuş əməkdaşlarının məlumatına görə, artıq seçki prosesində qanunsuzluqlar müşahidə olunmaqdadır. İqbal Ağazadənin MSK-dakı nümayəndəsi, Ümid Partiyasının icra aparatının rəhbəri Taleh Əliyevin sözlərinə görə, qayda pozuntuları əsasən elə dairənin özündə baş verib:
"Bu vaxta qədər Dairə tərəfindən 65 nəfər müşahidəçinin vəsiqəsi hələ də təqdim olunmayıb. Onlardan 35 nəfəri Ümid Partiyası tərəfindən təqdim olunan müşahidəçilərdir, 30 nəfər isə müstəqildir. İki saat öncə DSK sədri Nurəddin Nəsibova bununla bağlı məlumat verib, bütün bunların qayda pozuntusu olduğunu bildirdik. O söylədi ki, digər vacib işlərimiz var və o işlərlə yanaşı bunu da həll etməyə çalışacağıq. Ancaq 3 saatdan artıq vaxt keçib, hələ də, problem həll edilməyib. Bundan başqa artıq 10 və 9 saylı məntəqələrdə karusel əməliyyatı təşkil edilib 19 saylı məntəqədə isə bizim nümayəndələri provakasiyaya çəkərək, onlardan 1 nəfərini polis şöbəsinə aparıblar. Digər məntəqələrdə də media nümayəndələrinin və müşahidəçilərin seçki prosesini izləmələrinə ciddi problemlər yaradırlar".

Əli Rais,
Məğrur Mərd
Ağdaş