Daha bir ölkədə kütləvi iğtişaşlar başladı

Tacikistanın cənubundakı Xoroq vilayət mərkəzində kütləvi iğtişaşların başladığı barədə məlumat yayılıb. Aktual.az Asiya mediasına istinadən bildirir ki, iğtişaşlar, şəhərin mərkəzində bir neçə nəfəri güllələyən yerli OMON-çular tərəfindən törədilib.

Hadisəyə səbəb keçmiş səhra komandiri Məhmədbəkir Məhmədbəkirovun qardaşının saxlanılması olub. Yerli sakinlərdən bir qrupu onun müdafiəsinə qalxarkən, hüquq-mühafizə orqanlarının əməkdaşları iğtişaşı yatırtmaq üçün odlu silahdan istifadə ediblər. Nəticədə, 3 nəfər ağır yaralanıb. Onlardan ikisi xəstəxanada keçinib.

Bundan hiddətlənən etirazçılar günahkarların cəzalandırılmasını tələb ediblər. Güc strukturlarının binalarına od vurulub. Yerli sakinlərin bildirdiyinə görə, hal-hazırda Şəhər Daxili İşlər İdarəsinin və Prokurorluğun binaları yanır. Hadisə yerində 500-700 adam var.

Hakimiyyət hadisəyə nəzarət etmək üçün havaya iki vertolyot qaldırıb. Sakinlərə evlərini tərk etməmək tövsiyə olunub.
[media=https://www.youtube.com/watch?v=SOaKzTur7RU]