AzTV-yə ayrılan 660 milyon hara gedib?

«Tender adı altında alqı-satqılar əslində, saxta firmalar vasitəsilə həyata keçirilib»

Qulu Məhərrəmli: «Heç mənim yadıma düşmür ki, Alışanov var, onun televiziyası var, yoxsa yox…»

“Azərbaycan Televiziya və Radio Verilişləri” QSC-nin sədri Arif Alışanov məhkəməyə müraciət edərək, uzun illər bu telekanalda çalışmış məşhur jurnalist, professor Qulu Məhərrəmlinin cəzalandırılmasını tələb etsə də, nədənsə, özü məhkəməyə gəlmir. Alışanov bu iş üzrə dünənki məhkəmə iclasına da qatılmamışdı…


AzTV sədrini məhkəmədə təmsil edən vəkil Zaur Abbasov Qulu Məhərrəmlinin müsahibəsindəki ifadələrin böhtan və təhqir xarakterli olub-olmadığının müəyyənləşdirilməsi üçün liqvistik ekspertizanın təyin olunması barədə vəsatət qaldırıb.

Amma Qulu Məhərrəmli və vəkili Cavid Rzazadə vəsatətin baxılmamış saxlanılmasını istəyib.

“Əvvəla, bizə vaxt verilməlidir ki, vəsatətlə bağlı rəyimizi yazılı şəkildə təqdim edək, öz suallarımızı qoyaq. Həm də əvvəlcə məhkəmədə Qulu Məhərrəmlinin ifadəsini dinləməliyik. Bəlkə adam deyəcək ki, ”o müsahibəni mən verməmişəm”. Bundan başqa, ekspertiza bütün məqaləni qiymətləndirsə, onda hər bir söz barədə rəy verməlidir. Ona görə də adamlar konkretləşdirməlidir ki, hansı ifadələri böhtan, təhqir hesab edirlər”, – deyə Cavid Rzazadə bildirib.

Qulu Məhərrəmli isə vəsatətin özünü “böhtan nümunəsi” adlandırıb: “Yazıblar ki, ”Qulu Məhərrəmli qəsdən bu yazının KIV-də dərcinə nail olmaqla, Alışanova böhtan atıb, onun şərəf və ləyaqətini alçaldıb”. Mən jurnalistəm, tez-tez müxtəlif məsələlər barədə fikirlərimi soruşurlar, müsahibə verirəm. Sonuncu dəfə Rusiya telekanalında Qarabağ məsələsinin işıqlandırılması barədə fikirlərimi bildirdim. Indi bu o deməkdirmi ki, mən qəsdən Rusiya telekanalları ilə bağlı yazıların dərcinə nail olmuşam? Fevralda da televiziyanın yayıma başlamasının 60 illiyilə bağlı zəng edib fikirlərimi soruşdular, mən də cavab verdim. Heç mənim yadıma düşmür ki, Alışanov var, onun televiziyası var, yoxsa yox… Arif Alışanovun dövründə AzTV-yə dövlət büdcəsindən 660 milyon manat pul ayrılıb. Amma bu televiziyada maliyyə şəffaflıq yoxdur. Araşdırmalar zamanı məlum olub ki, tender adı altında alqı-satqılar əslində, saxta firmalar vasitəsilə həyata keçirilib”.

Telejurnalist qeyd edib ki, illərdir media orqanları AzTV-də korrupsiya halları, hətta kriminal olaylar barədə materiallar dərc edir və bu məlumatların heç biri təkzib olunmayıb: “Bu adam dövlətdən maliyyələşən bir qurumun rəhbəridir. Vətəndaşların cibi hesabına yaşayan televiziyanın özünün də, rəhbərinin də fəaliyyəti şəffaf olmalıdır. Mən ki o müsahibədə Alışanov AzTV-yə rəhbər təyin olunarkən ”Xəbərlər” proqramının kasetlərinin niyə səhv düşdüyündən danışmamışam…”

Qulu Məhərrəmli və vəkilinin etirazlarına baxmayaraq, hakim Azər Tağıyev iddiaçı tərəfin vəsatətini təmin edib. Linqvistik ekspertizanın nəticəsi məlum olana qədər məhkəmə prosesi təxirə salınıb.

Xatırladaq ki, Arif Alışanovla Qulu Məhərrəmli arasında məhkəmə çəkişməsi telejurnalistin bu ilin fevralında Azərbaycanda televiziyanın yayıma başlamasının 60 illiyilə bağlı müsahibəsindən sonra yaranıb. AzTV sədri həmin müsahibədəki fikirlərə görə Qulu Məhərrəmlinin CM-nin 147 və 148-ci (təhqir və böhtan) maddələrilə cəzalandırılmasını tələb edir.