Prokurorla əlbir olub cinayət törədən qadının şikayəti rədd edildi

Bu gün Bakı Apelyasiya Məhkəməsində hədə-qorxu ilə pul tələb etməkdə təqsirləndirilən Dünya Cəfərovanın cinayət işi üzrə məhkəmə prosesi başa çatıb.

Virtualaz.org saytının əldə etdiyi xəbərə görə, prosesə hakim Qail Məmmədov sədrlik edib.

Prosesdə Dünya Cəfərovanın cəzasının yüngülləşdirilməsi ilə bağlı apelyasiya şikayəti üzrə qərar elan edilib. Qərara görə, Dünya Cəfərovanın apelyasiya şikayəti təmin edilməyib.

Qeyd edək ki, Bakı Ağır Cinayətlər Məhkəməsinin hökmü ilə Dünya Cəfərova 10 il müddətinə azadlıqdan məhrum edilib.

İttihama görə, Dünya Cəfərova Baş Prokurorluğun Ağır Cinayətlərə dair İşlər üzrə İstintaq İdarəsinin həbsdə olan sabiq əməkdaşı Vüsal Müslümov və Sergey Biserovla birlikdə cinayət əməli törədiblər.

Zərərçəkmiş şəxsin şikayətindən sonra Vüsal Müslümov və Sergey Biserov həbs olunsalar da Dünya Cəfərova barədə həbs-qətimkan tədbiri seçilməyib. Məhkəmə prosesi keçirilən zamanı Dünya Cəfərova iclaslara gəlməyib. Bunun üçün də onun barəsində məhkəmə tərəfindən həbs qərarı verilib. Bundan sonra qadın həbs edilib və barəsində olan cinayət işi digərlərinin cinayət işindən ayrılaraq yenidən icraata verilib.

Bakı Ağır Cinayətlər Məhkəməsinin 1 dekabr, 2014-cü il tarixli hökmü ilə Vüsal Müslümov 12 il, Sergey Biserov 11 il müddətinə azadlıqdan məhrum edilib. Təqsirləndirilən şəxslər Cinayət Məcəlləsinin 182-ci (hədə-qorxu ilə pul tələb etmə) maddəsi ilə ittiham olunub. Vüsal Müslümov baş prokuror Zakir Qaralovun əmri ilə işdən kənarlaşdırılıb.

İnarə Rafiqqızı

Virtualaz.org