Hacı İbrahim Nehrəmli: "Gəlib pulunu götürsün..."

Sahibkar “Avesta Konserni”nin işçilərinə maaş verilməməsi məsələsinə aydınıq gətirib

“Avesta Konserni” MMC-nin işçilərinə maaş verməməsi barədə kütləvi infrmasiya vasitələrində məlumatlar yayılıb. Şirkətin keçmiş mühasibi Sabirə Sadıqova media vasitəsilə şirkət rəhbərliyini işçilərə olan əmək haqqı borclarını ödəməyə çağırıb. O, hökumətdən qanunsuzluğun aradan qaldırılmasına kömək göstərilməsini xahiş edib. Onun sözlərinə görə, işçilər 2015-ci ildən maaşlarını vaxtında ala bilmirlər.

ANSPRESS məsələ aydınlıq gətirmək üçün “Avesta Konserni” MMC-nin sahibi Hacı İbrahim Nehrəmli ilə əlaqə saxlayıb. Sahibkar bildirib ki, əslində həmin işçi məsələni şişirdir.

“Gərək öz dilindən danışsın. Şirkətdə 5 ildir işləyir. Bu vaxta qədər çörək qazanıb. Heç vaxt işçilərin pullarını gecikdirməmişəm. Sadəcə son vaxtlar baş verən hadisələrlə bağlı həmin mühasibin maaşı bir az gecikdirilib. Ona 1800 manat verilməlidir. Pulu artıq hazırdır. Şəxsən mənimlə əlaqə yarada bilərdi. Niyə mətbuata çıxıb, məsələni şişirdir bilmirəm. Gəlsin pulunu aparsın da”, - deyə Hacı İbrahim Nehrəmli bildirib.

* * *15:21

“Avesta Konserni” MMC-nin mühasibi Sabirə Sadıqova media vasitəsi ilə şirkət rəhbərliyini işçilərə olan əmək haqqı borclarını ödəməyə çağırıb və hökumətdən qanunsuzluğun aradan qaldırılmasına kömək göstərilməsini xahiş edib.

Onun sözlərinə görə, işçilər 2015-ci ildə yalnız yanvar ayının əmək haqqını ala biliblər. O da martda... Digər aylar üçün isə əmək haqları ödənilməyib.

“Mən 2013-cü il oktyabrın ikinci ongünlüyündə “Avesta Konserni” MMC-nin baş ofisində işə qəbul olunmuşam. Əmək müqaviləsində əmək haqqım 200 manat qeyd olunub, amma tutduğum vəzifə düzgün qeyd edilməyib. Əmək müqaviləsinin ikinci nüsxəsi mənə təqdim olunmayıb. Mən vitse-prezident yardımçısı, Maliyyə Departamentində təchizatçılarla iş bölməsində təchizatçıların mühasibat hesabatının təqdim olunması işi ilə məşğul olmuşam. 2014-cü il iyulun 1-də Maliyyə Departamentində mühasib vəzifəsinə təyin edilmişəm. Əmək haqqı 250 manat olub. 2015-ci il aprelin 10-da şəxsi istəyimlə işdən azad olunmuşam. 2015-ci il üçün əmək haqqımın cüzi bir hissəsini ala bilmişəm”, - o qeyd edib.

S. Sadıqovanın sözlərinə görə, şirkət 2015-ci ilin yanvarından əmək haqlarını gecikdirilməyə başlayıb.

“Avesta Konserni” MMC-nin rəsmi İnternet saytında göstərilən telefonlara cavab verən olmayıb. ("Turan")
[media=https://www.youtube.com/watch?v=aFyRwUt-pC0]