AXCP-nin sökülən qərargahının sahibi polisə aparıldı

Azərbaycan Xalq Cəbhəsi Partiyasının sökülən qərargahının sahibi Azər Əsgərov bu gün günorta saatlarında həbs edilib.

Buna səbəb mülk sahibinin təzminat ödənilməməsi səbəbindən sökülən ərazidə çadır qurub, etiraz aksiyası keçirməsi olub. Azər Əsgərov hazırda Nərimanov Rayon Polis İdarəsi 18-ci polis bölməsindədir.

Bu barədə musavat.com-a həbs edildiyi vaxt Azər Əsgərov özü zəng edərək məlumat verib. O bildirib ki, 3 ay ərzində heç bir aidiyyatı orqan onun etdiyi şikayətlərə baxmır: “Etiraz etməyimə səbəb pozulan hüquqlarımdır. Keçən 3 ay ərzində heç bir dövlət orqanı şikayətlərimə baxmır. Sökülən mülküm üçün mənə təzminat belə ödənilmir. Sanki Azərbaycanda dövlət yoxdur. Həbs edilərkən mayor başda olmaqla polis əməkdaşları mənə qarşı zorakılıq edərək maşına mindirdilər. Sona qədər mübarizə aparacam. Axşam yenə çadır qurub gecəni sökülən ərazimdə keçirəcəm”.

Xatırladaq ki, AXCP qərargahında martın 3-ü gecə saatlarında partlayış baş vermişdi. Bir gün sonra qərargah tamamilə sökülmüşdü. Partiya qərargahı kirayəyə götürmüşdü. Mülkün əsl sahibi Azər Əsgərovdur.