Milli Elmlər Akademiyası korrupsiya himayədarına çevrilib

Bir müddət öncə Azərbaycan Milli Elmlər Akademiyasına seçkilərlə bağlı mediada qalmaqallı yazılar dərc edildi. Bu yazılarda məlum seçkilərin ədalətsiz olması qeyd olunurdu. Bu yazıların ardından cumhuriyyet.az-a hamımızı təəccüb və təəssüf hissi içərisində qoyan bir məlumat daxil olub. Redaksiyamıza daxil olan xəbərdən məlum olur ki, AMEA-ya bu ilki seçkilərdə Milli Təhlükəsizlik Nazirliyinin 2005-ci ilin iyununda keçirdiyi xüsusi əməliyyat zamanı xidməti otağında külli miqdarda rüşvət alarkən yaxalanan Bakı Dövlət Universitetinin Ümumi və qeyri-üzvi kimya kafedrasının müdiri Babanlı Məhəmməd Baba oğlu, həmçinin Azərbaycan Pedaqoji Universitetinin professoru (uzun illər Naxçıvan Pedaqoji Universitetinin rektoru olmuşdur), 2006-cı ildə universitetdə baş vermiş bir rüşvət qalmaqalına görə şiddətli töhmət almış Cəfərov İsgəndər Həsən oğlu da vardır. Hətta M.Babanlı 2005-ci ildə Cinayət Məcəlləsinin 311.3.3-cü (külli miqdarda rüşvətalma) maddəsi ilə təqsirləndirilərək həbs edilib, barəsində məhkəmə hökmü də var.