İŞİD-ə qoşulan rusiyalı məşhur aktyor Suriyada öldü

Rusiyanın gənc və istedadlı aktyoru, rejissorların böyük ümidlər bəslədiyi Vadim Dorofeyev "İraq Şam İslam Dövləti" terror təşkilatının sıralarında Suriyadakı döyüşlərdən birində məhv edilib. APA TV-nin məlumatına görə, aktyor bir neçə ay əvvəl həyat yoldaşını və azyaşlı övladlarını ataraq, Suriya-İraq sərhədinə yollanmışdı.

Vadim Dorofeyevin aktyorluq karyerası Ata Bodrovun filmlərindən birində baş rolla başlayıb. Daha sonra onun iştirakı ilə bir sıra populyar seriallar çəkilib, bir neçə reytinqli tok-şoulara qatılıb.

2014-cü ilin yazında aktyor müsahibələrindən birində demişdi ki, çəkilişlərdə həqiqi güllə atmırlar və "kiçik bir layihə" vəd etmişdi. Amma bunun nə "layihə" olduğunu onun dostları və ailəsi yalnız bir neçə ay sonra öyrəndilər.

Vadimin həyat yoldaşı Alyona bildirib ki, əri pis adamlara qoşulub: "Son vaxtlara qədər məni dilə tuturdu ki, İslamı qəbul edim və uşaqlarla birlikdə Suriyaya - onun yanına gedək. Vadimin məqsədi cihad idi".

Alyonanın sözlərinə görə, həyat yoldaşı günlərin birində Şimali Qafqazdan döyüş təcrübəsi olan bir nəfərlər dostluq etməyə başlayıb. 2014-cü ilin Yeni il günü isə Vadim, yaxın dostlarından olan başqa bir məşhur rusiyalı aktyorla birlikdə İslam dinini qəbul edib.

Ötən il sentyabrın 16-da Vadim Dorofeyev həyat yoldaşına deyir ki, yeni kino layihəsini müzakirə etmək üçün xaricə gedir. Beləliklə, o, Moskvadan İstanbula, oradan isə Suriyaya yollanır.

Vadim Dorofeyevi İŞİD-ə qoşulmaqdan çəkindirməyə vaxtilə Moskva məscidinin imamı Şamil Alyautdinov da cəhd edib. Lakin Rusiya paytaxtının ən nüfuzlu din adamlarından birinin məsləhətləri nəticə verməyib.

Ötən ilin dekabrınadək Vadim səs-soraq gəlmir. Amma Yeni ilə iki həftə qalmış həyat yoldaşı ondan qısa ismarışlar (SMS) almağa başlayır. Bir neçə gün əvvəl isə Suriyadan Alyonaya Vadim Dorofeyevin ölüm xəbəri gəlir.

Vadim Dorofeyevin 5 yaşlı oğlu və 7 aylıq qızı qalıb.//musavat.com/