Bakı meriyasının adından yayılan məktub saxta çıxdı - (Yenilənib)

Milli Şuranın 15 mart mitinqinə qarşı təxribata yol verilib.

Facebook-da və saytlarda Bakı Şəhər İcra Hakimiyyətinin İctimaiyyətlə əlaqələr şöbəsinin müdiri Zaur Ramazanovun imzası ilə 15 mart mitinqinə razılıq verilmədiyinə dair məktub yayılıb.

Azadlıq.infonun xəbərinə görə, Mitinq Komitəsinin rəhbəri Fuad Qəhrəmanlı bununla əlaqədar bildirib ki, həmin məlumatı görən kimi Zaur Ramazanovla əlaqə saxlayıb.

Zaur Ramazanov deyib ki, onun imzası ilə yayılan həmin məktub saxtadır. Bakı Şəhər İcra Hakimiyyəti 15 mart mitinqi ilə bağlı cavabı hələ hazırlamayıb. Cavab hazır olan kimi təşkilatçılara göndəriləcək.

BŞİH rəsmisi bu mövzuda təşkilatçıların xəbəri olmadan yayılan istənilən məlumata inanmamağı məsləhət görüb

* * *13:15

Bakı Şəhər İcra Hakimiyyəti (BŞİH) Milli Şuranın mitinqinə icazə verməyib.

Musavat.com-a daxil olan rəsmi cavab məktubunda BŞİH adından yazılıb ki, mitinqin keçirilməsi məqsədəmüvafiq deyil. Cavab məktubunu Zaur Ramazanov imzalayıb.

Məktubda bildirilir ki,Yasamal rayonu, Mirəli Seyidov küçəsində yerləşən "Məhsul" stadionunda təmir-tikinti işləri davam etdiyindən 15 mart tarixində həmin ərazidə mitinq keçirilməsi məqsədəuyğun deyil.