"Azadlıq-2015" müzakirə edir- "Vəziyyət yaxşı deyil!"- Fotolar

Aprelin 8-də “Azadlıq 2015” seçki blokunun təşkilatçılığı ilə “Dəyişən dünya və Azərbaycan: mövcud durum və perspektivlər” adlı dəyirmi masa keçirilib. Musavat.com-un xəbərinə görə, dəyirmi masada bloka daxil olan səkkiz partiyanın- KXCP, “Azadlıq”, AzDP, AXP, ALDP, VİP, BAP və “Aydınlar” Partiyasının təmsilçiləri iştirak edirlər. O cümlədən bloka daxil olmayan Müsavat Partiyasının təmsilçisi Arzu Səmədbəyli də tədbirdə iştirak edir. Həmçinin tədbirə ekspertlər, politoloqlar da qatılıb.

KXCP sədri Mirmahmud Mirəlioğli tədbir barədə məlumat verərək bildirib ki, dünyada gedən proseslərin Azərbaycana ciddi təsirləri olacağı şübhəsizdir. Bu səbəbdən baş verəcək, gözlənilən dəyişiklikləri müzakirə etmək vacibdir.

AzDP sədri Sülhəddin Əkbər isə çıxışında bildirib ki, müzakirə olunan məsələ çox genişdir: “Azərbaycandakı vəziyyəti düzgün qiymətləndirmək üçün ölkənin hansı mühitdə olduğunu bilməliyik. Azərbaycan kiçilən dünyanın kiçik bir parçasıdır. Dünyadakı proseslər təsir edir. Başlıca prosesləri nəzərə alıb vəziyyəti qiymətləndirməliyik”. O, dünyada baş verən vacib, önəmli prosesləri sadalayaraq onların arasında yumşaq gücün, iqtisadi gücün önəminin artmasını xüsusi vurğulayıb. S.Əkbər bildirib ki, dünyadakı vacib proseslərin fonunda ölkədə demokratiya və insan azadlıqları sahəsində vəziyyət getdikcə pisləşir. Siyasi müxalifət faktiki olaraq oyundan kənarlaşdırılıb. S.Əkbər siyasi hakimiyyətə vəziyyətdən çıxmaq üçün təkliflər də verib. Siyasi məhbusların azadlığa buraxılması təkliflər arasındadır.

VHP sədri Sabir Rüstəmxanlı isə qeyd edib ki, bu ür müzakirələr vacibdir: “Azərbaycanın vəziyyəti çox ağırdır. Çünki Azərbaycanın sükanı öz əlində deyil”. Onun sözlərinə görə, dünya reallıqda üçüncü dünya müharibəsinə hazırlaşmaqdadır. O, həmçinin, ölkənin təhlükəsizliyindən narahatlığını vurğulayıb.




Röya RƏFİYEVA
Fotolar müəllifindir.