Britaniya ilə rəsmi Bakı arasında qalmaqal

İngiltərə səfirinin açıqlaması sərt reaksiya doğurdu; Novruz Məmmədov: “O elə hesab edir ki, Azərbaycanla bağlı nə istəsə deyə və edə bilər”
Azərbaycan hakimiyyətinə qarşı tənqidi fikirlər səsləndirənlər sırasına daha bir ölkə qoşulub. Daha dəqiqi, Böyük Britaniyanın səfiri Azərbaycan hökumətinin ünvanına sərt sözlər deyib. “Turan” agentliyinin bir sıra Britaniya KİV nümayəndələrinin Azərbaycana səfərinin qadağan edilməsi ilə bağlı müraciətinə cavab olaraq səfir İrfan Siddiq Bakının Britaniya jurnalistlərinə qarşı qadağasını biabırçılıq adlandırıb.

Sitat: “Təəssüf ki, bəzi Britaniya jurnalistləri oyunları işıqlandırmaq üçün akkreditasiya olmayıblar. Bəzi jurnalistlərin bu hadisənin bir hissəsi olmaq imkanından məhrum edilməsi biabırçılıqdır. Bütün bunların Azərbaycan üçün təəssüf doğuran yekunu olub. Jurnalistlərin buraxılmasından imtinanın niyyəti mənfi qiymətləndirmələrdən qaçmaq cəhdi idisə, nəticə tam zidd olub və bir çox mənfi materialların ortaya çıxmasına səbəb olub. Müxtəlif nöqteyi-nəzərlərin qəbul olunması güclü demokratiyanın ən mühüm cəhətlərindən biridir”.
Gözənildiyi kimi, Britaniya səfirinin açıqlamasına yüksək səviyyədə cavab gecikməyib. Prezident Administrasiyası rəhbərinin müavini, Xarici əlaqələr şöbəsinin müdiri Novruz Məmmədov twitter hesabından səfirin əməllərini pisləyən açıqlama yazıb. Sitat: “Dünən mətbuatda heç bir çərçivəyə sığmayan bir informasiyaya rast gəldim. Birləşmiş Krallığın Azərbaycandakı səfiri Britaniya jurnalistlərinin akkreditasiya olmamalarını biabırçılıq adlandırıb. Görünür, Birləşmiş Krallığın səfiri elə hesab edir ki, Azərbaycanla bağlı nə istəsə deyə və edə bilər, təəssüf”.

Qeyd edək ki, Azərbaycan hakimiyyətinin Qərbi Avropada ən yaxın münasibətlərə malik olduğu ölkələrdən biri və ya birincisi Böyük Britaniya krallığıdır. Bakı ilə London arasında uzun illər isti münasibətlər mövcud olub. Britaniyadan şahzadə səviyyəsində yüksək titullu rəsmilər dəfələrlə Bakıda qonaq olublar. Bu mənada uzun müddət Qərbdə Bakıya qarşı tənqidi fikirlərə London qoşulmayıb. İndi isə vəziyyət dəyişib. Britaniya mətbuatı rəsmi Bakını sərt şəkildə tənqid edir. Buna cavab olaraq Azərbaycan hakimiyyəti ingilis qəzetlərinə məhdudiyyət tətbiq edib.



Fransa Beynəlxalq Araşdırmalar Mərkəzi (CERI), Paris Siyasi Elmlər İnstitutunun eksperti Bayram Balçı deyir ki, Bakı ilə Qərb arasında bağlar tamamilə qopmaq həddinə yaxınlaşır. B.Balçının fikrincə, "Eurovision"dan sonra Avropa Oyunları Azərbaycanı yenidən diqqət mərkəzinə çıxarıb: “Bu oyunlar Azərbaycana baş bəlası olacaq. Reklam, hörmət gətirmək əvəzinə başağrısı, tənqidlər gətirəcək. Çünki bu cür tədbirlər bir qayda olaraq ölkədəki insan haqları, demokratiyanın vəziyyətinin tanıdılmasına, yerli fəalların bu sahədə problemləri dünyaya çıxarmaları üçün unikal şans verir. Bu isə Azərbaycanın indiki vaxtında heç də müsbət imic yaratmayacaq”.

Ancaq o da var ki, rəsmi Bakı Qərbin qarşısında geri çəkilmir, əksinə, hücum mövqeyi nümayiş etdirir, Qərb hökumətlərini, beynəlxalq qurum və siyasətçiləri tənqid edir. Doğrudanmı, Bakının hansısa ciddi kartı var? Bayram Balçı deyir ki, Bakı öz durumunu bildiyi üçün belə rahatdır: “Bakı bilir ki, nə qədər tənqid etsə də, fərqi yoxdur. Ən pis vəziyyətdə Bakı Moskva ilə yaxınlaşma kursu götürə bilər. Belə olarsa, Qərb daha çox itirəcək. Bunu Bakıda da bildikləri üçün sakit dayanmırlar. Bu mənada çox təəssüf ki, Azərbaycan demokratik fikirlər üçün çox ümidsiz bir durumdadır. Mən həmişə demişəm ki, Qərb vaxtında Rusiyanı durdura bilsəydi, o zaman indiki hadisələr baş verməzdi. Rusiya Ukrayna və digər ölkələrdə Qərbə qarşı bu şəkildə hücum edə bilməzdi. Qərbin indi Bakıya qarşı hansısa addımı atması mümkün deyil. Çünki ortada güclü Rusiya faktoru var. Moskvaya sığınarsa Bakı Qərbdən gələn təzyiqlərə qarşı dayanacaq. Yalnız BTC layihəsi davam edəcək. Çünki bu bir beynəlxalq layihədir və çox böyük miqdarda pul yatırılıb”.

B.Balçı deyir ki, Qərb Azərbaycana qarşı siyasi təzyiqləri artırsa da, embarqoya getməyəcək: “Embarqoya inanmıram getsinlər. Amma siyasi təzyiqlər var, lakin onun da faydası yoxdur. Bundan daha sərt təzyiqlərin olmasını güman etmirəm”.

KƏNANh/musavat.com/