Eldar Həsənovdan ittihamlara sərt cavab

"Eynulla Fətullayev və bu marionetin ipini əlində saxlayanlar haqqında da fikirlərimi demişəm"

"Yiyəsinə olan hörmətə görə dəyməzlər” prinsipini əsas götürərək çox mətləblərə toxunmaq istəmirəm"

Azərbaycanın sabiq baş prokuroru, ölkəmizin Serbiyadakı səfiri Eldar Həsənov son günlər barəsində mətbuatda səslənən fikirlərə münasibət bildirib. E.Həsənovun Hafta.az-a müsahibəsini qısa ixtisarla təqdim edirik:

- Eldar müəllim, son zamanlar bəzi mətbuat orqanlarında, daha dəqiq desək Eynulla Fətullayev Sizinlə bağlı məqalələr, müxtəlif ittihamlar yazmağa başlayıb. Sizcə adınızın uzun müddətdən sonra yenidən gündəmə gətirilməsi nə ilə bağlıdır? Sizə qarşı ittihamlara necə münasibət bildirərdiniz?

- Bunlar ittiham yox, zaman-zaman olduğu kimi yenə də qərəzlə, dərin kin və küdurətdən yoğrularaq yazılan və yazdırılan, heqiqete uyğun olmayan uydurmalar və qarayaxmalardan başqa bir şey deyildir.

- Yazdırılan deyərkən nəyi nəzərdə tutursunuz?

- Hər halda məqalənin E.Fətullayevin “əl işi” olmasına inanacaq qədər sadəlövh deyilsiniz?! “Milyarderlər İttifaqı”, Abbas Abbasov, Elşad Abdullayev, Arif Məmmədov……. “hamısının arxasında Eldar Həsənov dayanır” və s. Bu kimi iftiralar. Məqalənin məhz indiki məqamda çıxması bir az düşündürücüdür. Səfir kimi fəaliyyət göstərdiyim ölkələrlə Azərbaycan arasında əlaqələrdə nəzərə çarpacaq bir nailiyyət olduğu zaman dərhal adımla bağlı bir-iki yerli mətbuatda “canlanma” baş verir. Baxmayaraq ki, Serbiya və Monteneqro prezidentləri, Bosniya və Herseqovinanın dövlət başçısı məhz Azərbaycan Prezidenti cənab İlham Əliyevə, ölkəmizə bəslədikləri səmimi və dostluq münasibətlərinə, yüksək ehtirama görə Birinci Avropa Oyunlarının açılış mərasimində iştirak etmişdilər, belə görünür ki, bundan kimsə narahat olub və yəqin ki, bu amil də məqalənin indi ərsəyə gəlməsinə rəvac verib.

Bu cürəsassız, qərəzli və məntiqsiz məqalələr məni qətiyyən narahat etmir. Daxilən rahatam. Çünki, xalqıma, ölkəmə, dövlətimə, dövlətçiliyimizə və dövlət başçısına qarşı sədaqətimi, səmimi və təmənnasız xidmətimi sübut etməyə nə ehtiyac, nə də zərurət duyuram. Bu, kifayət qədər aydın və bəllidir. Bu həqiqət uzun illərdən bəri əməli fəaliyyətimlə həmişə öz təsdiqini tapır. Ümid edirəm ki, məqalədə bir neçə dəfə Azərbaycanın xüsusi xidmət orqanlarına istinad olunduğundan onlar obyektiv həqiqətə söykənən münasibətlərini bildirəcəklər. Hər halda bununla bağlı müvafiq qurumlara artıq müraciət etmişəm. Çünki, bu eyni zamanda qanunvericiliyə görə bu sözü gedən dövlət qurumlarına qarşı ciddi ittihamdır. Hansı xüsusi xidmət orqanın əlində bu səpgili məlumatlar varsa, tədbir görmək əvəzinə müxbirlə bölüşər?! Bunu ictimailəşdirər? Hansı əsasla, nə məqsədlə?! Digər tərəfdən kimə icazə verilib ki, dövlət orqanlarının adından böhtan və şayiələr yazsın və cəzasız qalsın?! Ən azı burdan nəticə çıxarmaq olar ki, bu hansı təxəyyülün məhsuludur. O ki qaldı ünvanıma yazılan böhtanlara, qanuna zidd əməllərə, əgər onların mində biri öz təsdiqini taparsa müstəqil Azərbaycan dövlətinin qanunları qarşısında cavab verməyə hər an, həmişə hazıram. Məsələyə aydınlıq gətirilməsə və yenidən ehtiyac duyularsa öz mövqeyimi hüquqi müstəvidə daha geniş və əsaslı şəkildə bildirərəm.

- Eldar müəllim, bu ittihamları cavablandırmaq istəmirsiniz?

- Böhtana nə cavab vermək olarki?! Sizin sualların cavablandırılmasını belə artıq hesab edirəm. Eynulla Fətullayev və bu marionetin ipini əlində saxlayanlar haqqında da fikirlərimi demişəm. Sadəcə məqalədən sonar müraciətlər və suallar çoxaldığından yığcam münasibət bildirmək istədim. Belə məqamlar üçün gözəl atalar sözümüz var: “Abrımızı satın alıb” bu böhtan və qarayaxmalara təmkinlə yanaşmağa çalışıram. Yəqin ki, bir az yazıb yorulduqdan sonra başqa mövzu axtaracaqlar! Mən isə hələlik sadəcə olaraq “yiyəsinə olan hörmətə görə dəyməzlər” prinsipini əsas götürərək çox mətləblərə toxunmaq istəmirəm.