Azərbaycanlı oliqarxın qızı milyonlarını nümayiş etdirdi

Virtualaz.org saytı sosial şəbəkələrdə öz var-dövlətini və bohem həyat tərzini utanmadan gen-bol təbliğ edən məmur və oliqarx övladları barədə dəfələrlə yazıb. Onların öz bahalı saatları, gözqamaşdıran brilyantları, dəbdəbəli ev və avtomobilləri ilə necə öyündükləri haqda bəhs edib.

Azərbaycanda bir neçə aydır ki, “kredit oliqarxları” işi üzrə siyasi qalmaqal yaşanır. Bu işin əsas fiqurantlarından biri də ata və oğul Nizami və Nəsib Piriyevlərdir. Ölkənin əsas bankı olan Beynəlxalq Banka qaytarılmayan kreditlərin ümumi həcmi 1 milyard dollara yaxındır. Ata Piriyev buna görə həbsə də düşüb-çıxdı. Oğul Piriyev isə qaçıb. İnterpol Nəsib Piriyevi bu günlərdə axtarışa verib. Oğul Piriyevin Beynəlxalq Banka 170 milyon dollar kredit borcu var.

Bəs Piriyevlərin biznes layihələrinin həyata keçirilməsi üçün ayrılmış bu dövlət vəsaiti hara xərclənib, necə xərclənib?