Ölən bacıların qəzasının təfərrüatı – İşə gecikməmək üçün…+ Foto

Xəbər verdiyimiz kimi, bir neçə gündür danışılan bacıların düşdüyü qəza haqda bu gün daha bir acı xəbər gəldi. Hadisə günü yerindəcə vəfat edən Sürəyya Qəhrəmanlının özündən bir yaş kiçik bacısı Leyla Qəhrəmanlı da xəstəxanada vəfat etdi.

“Qafqazinfo”nun əməkdaşları bu gün bacıların bir neçə gün öncəyə kimi yaşadığı binada olublar.

Biz 3-cü mikrorayonda yerləşən binaya çatanda həyətdə xeyli insan- kişilər, qadınlar, uşaqlar, qocalar, hər kəs vardı. Öyrəndik ki, Leylanın atası Nazim kişi qızını məscidə yuyulmağa aparıb. Cəsəd oradan evə gətiriləcək, vidalaşmadan sonra özündən 3 gün öncə vəfat edən böyük bacısı Sürəyyanın məzarının yanında dəfn ediləcək.



Uzun illər ailə ilə qonşu olan və onları yaxından tanıyan şəxslə söhbətimizdə öyrəndik ki, Sürəyyanın da dəfn olunduğu yer ailə üçün özəldir. Belə ki, Sürəyya rəhmətlik nənəsinin adını daşıyır. Onun nənəsi bir neçə il öncə sentyabrın 15-də, nəvəsi Sürəyyanın vəfat etdiyi tarixdə dünyasını dəyişib. Nəvə Sürəyya da nənə Sürəyyanın məzarının yanında dəfn olunub. Görünür, bizim Sürəyya nənəsinin təkcə adını yox, həm də taleyini özündə daşıyıb.


Ailəni bu hüznə qərq edən hadisə isə bacıların işə gecikməsinə görə olub. Sürəyya valideynlərinə ilk dərs günü olduğu üçün Bakı-Sumqayıt yolu ilə getməyəcəyini, Novxanı yolundan istifadə edəcəyini deyib. Yaxşı tanımadığı bu yol isə onu yubadıb. İnsan resursları şöbəsində çalışdığı klinikaya çatmaq üçün tələsən Sürəyya yüksək sürətlə hərəkət edərək qarşısındakı maşını ötməyə çalışıb, bu zaman isə qarşıdan gələn yük maşını ilə toqquşub.



Sürəyya özü çata bilməsə də, bacısı Leylanı həmin klinikaya çatdırıb. Lakin Leyla bir neçə gün sonra elə oradaca canını tapşırıb…