İş adamları “Lotu Quli”yə qarşı birləşdi - Silahlı dəstələr yaradılır

KRİMİNAL AVTORİTETİN ADAMLARININ BAKIDAKI YAXINLARI MÜƏYYƏNLƏŞDİRİLİR

Hazırda Azərbaycanda həbsdə olan "Lotu Quli” ləqəbli kriminal avtoritet Nadir Səlifovun adamlarının Ukraynada yaşayıb işləyən azərbaycanlı biznesmenləri incitdiyi, onları ağır "vergi”lərə məhkum etdiyi, bu pulları verməyənləri isə döydürdüyü, qaçırdığı barədə məlumat vermişdik.

Redaksiyamıza bu məsələlərlə bağlı yeni məlumatlar daxil olub. Ukraynada işləyən azərbaycanlılardan bakipost.az-a verilən məlumata görə, biznesmenlər mərhum kriminal avtoritet Rövşən Lənkəranski ilə aralarında olan davanın qisasını azərbaycanlı iş adamlarından almağa çalışan "Lotu Quli”yə qarşı tədbir görməyə başlayıb. Mənbəmiz bildirir ki, Ukraynada işləyən azərbaycanlılar Qulinin adamlarının özbaşınalıqlarından bezərək onlara adekvat cavab verməyə qərar veriblər. Belə ki, biznesmenlər avtoritetin adamlarının onlardan tələb etdiyi xəracın az bir hissəsini öz aralarında toplayaraq xüsusi dəstələr yaratmağa başlayıblar. Həmin dəstələr oradakı biznesmenlərin mühafizələrini təşkil edəcək və "Lotu Quli”nin adamlarının təhdidlərinə adekvat cavab verəcək.

Mənbə onu da əlavə edir ki, iş adamları artıq Bakıdakı əlaqələrindən istifadə edərək, "Lotu Quli”nin Ukraynada və Azərbaycandakı adamlarının yaxın ətraflarının da siyahısını hazırlayır. Məlumata görə, bu işlərdə onlara mərhum Lənkəranskinin Bakıdakı və Kiyevdəki adamları köməklik göstərir. Ukraynadakı silahlı mühafizəçiləri də azərbaycanlı iş adamlarına məhz Rövşənin yaxın adamları tövsiyə edib.

Biznesmenlərdən əldə etdiyimiz məlumatlardan belə görünür ki, bu qovğa hələ yenicə başlayır və "xərac davası" Ukraynada hələ çox azərbaycanlının qanını axıdacaq.

Politika.Az