Əsgər postda 5 əsgəri öldürüb 5-ni yaraladı..., bu dəfə Koreyada

Cənubi Koreya ordusunun sıravi əsgəri Şimali Koreya ilə sərhəddəki postda növbə çəkərkən kütləvi qətliam törədib.

Virtualaz.org saytı xəbər verir ki, əsgər postda 5 əsgər yoldaşını güllələyərək öldürüb, daha 5 əsgəri isə yaralayıb.

Hadisə Konvando əyalətində baş verib. Ucqar dağlıq ərazidə yerləşən postda baş vermiş qırğının detalları və motivləri hələ məlum deyil.

Cənubi Koreyanın “Yonhap” agentliyinin məlumatına görə, əsgər silahını götürərək postdan qaçıb və gizlənib. Hazırda onun axtarışları gedir.

Qeyd edək ki, Cənubi Koreyada icbari hərbi xidmət mövcuddur və əsgərlik müddəti iki ildir. Orduya çağırılanların əksəriyyəti Şimali Koreya ilə sərhəddə xidmət keçir. Çağırış sistemi sayəsində Cənubi Koreya ordusunda 600 min əsgər xidmət edir.