“Bunu İqbal Ağazadə deyirsə, deməli, MTN deyir”

Hakimiyyət cəmiyyətə yeni yalan sırımaq istəyir; İbrahim İbrahimli bunu Milli Şuraya qarşı təxribat sayır

Ümid Partiyasının sədri İqbal Ağazadə “Yeni Müsavat” qəzetinə müsahibəsində qəribə bir uydurma ilə çıxış edib. Ad çəkmədən bildirib ki, Azərbaycana ictimai-siyasi fiqurların şəxsi həyata müdaxilə ilə şantaj edilməsi təcrübəsini 1993-cü ildə müxalifət liderlərindən biri gətirib.

Azərbaycanda ictimai-siyasi proseslərə bələd olan hər kəsə məlumdur ki, bu üsuldan yalnız İlham Əliyev prezident kürsüsünə oturandan sonra hökumət öz rəqiblərinə qarşı istifadə etməyə başlayıb. İqbal Ağazadə bunun məsuliyyətini niyə İlham Əliyevin üzrəindən götürüb, müxalifət düşərgəsinə atmaq istəyir, səbəbi aydındır. Sadəcə, belə sifariş verilib.

Amma sifariş görünür, təkcə İqbal Ağazadəyə verilməyib. Hakimiyyət orqanlarına bağlı olan saytlar Ümid sədrinin uydurmasına konkret böhtan da əlavə edib, tirajlayıblar. Yazıblar ki, guya araşdırıb tapıblar, söhbət AXCP sədri Əli Kərimli və Milli Şuranın Koordinasiya Mərkəzinin üzvü, Xalq Hərəkatının tanınmış simalarından biri İbrahim İbrahimlidən gedir. Guya, Əli Kərimlinin təşkilatçılığı ilə o zaman Azərbaycan Xalq Cəbhəsi İcraiyyə Komitəsinin sədri olan İbrahim İbrahimlinin səsi gizlin yazılıb və bununla o, şantaj olunub. İbrahim İbrahimli də bunun nəticəsində 1995-ci ildə təşkilatı tərk etmək məcburiyyətində qalıb.

Göründüyü kimi, hədəf də yenə də Əli Kərimli və Milli Şurada onunla çiyin-çiyinə indiki hakimiyyətə qarşı prinsipial mübarizə sərgiləyənlərdir. Bəs, sifariş hardan gəlir? Şübhəsiz ki, hakimiyyət orqanlarından. Konkret bu halda gümanlar müxalifətçiləri güdməyi əsas işinə çevirmiş Milli Təhlükəsizlik Nazirliyinin üzərində cəmləşir. Çünki İqbal Ağazadənin o “bulaqdan” su içdiyini Azərbaycanın ictimai-siyasi çevrəsində bilməyən yoxdur. Hətta təxminən 4 il qabaq Müsavat başqanı İsa Qəmbər də bunu partiyasının Məclisində bu şəkildə ifadə etməyə məcbur olmuşdu: “...sən MTN-in bir dənə gədəsinin ixtiyarında olan adamsan”.

Elə İbrahim İbrahimli də MTN-dən şübhələnir: “Bunu əgər İqbal Ağazadə deyirsə, deməli, MTN deyir”.

Mövzu ilə bağlı müraciət etdiyimiz İbrahim bəy bu uydurma ittihama çox lakonik cavab verdi: “O qədər qeyri-ciddi söhbətdir ki...”.

İbrahim bəy xatırladır ki, onun 1993-cü ildə Xalq Cəbhəsi İcrayə Komitəsinə sədr gəlməsinin də, 1995-ci ildə Xalq Cəbhəsindən getməsinin də səbəbi yaxın siyasi tariximizdən az-çox məlumatlı olan hər kəsə bəllidir.

O, 1993-cü ildə AXC hakimiyyəti devriləndən sonra təşkilat rəhbərliyinin və sədr Əbülfəz Elçibəyin təklifi ilə İcrayə Komitəsinə sədr gəlir. İbrahim ibrahimlə o zaman deputat idi və bu transfer sədri Bakıda olmayan, rəhbər şəxsləri və fəalları təqib edilən, pərən-pərən düşən Xalq Cəbhəsini qoruyub-saxlamağa çox kömək edir. Lakin İbrahim bəy hələ bu təklifi qəbul edərkən açıq bildirir ki, Xalq Cəbhəsi böhrandan çıxandan sonra istefa verib, fəaliyyətini Müsavat Partiyasında davam etdirəcək. Xalq Cəbhəsinin 1995-ci ildəki qurultayında çıxışı zamanı isə İbrahim İbrahimli verdiyi sözü yerinə yetirmək istədiyini deyir: “Mən Xaql Cəbhəsinin rəhbərliyinə gəldiyim zaman həm cəmiyyətə, həm də cəbhədaşlarıma məlumat vermişdim ki, təşkilat böhrandan çıxandan sonra siyasi fəaliyyətimi yenidən Müsavat Partiyasında davam etdirmək fikrindəyəm. Əziz qurultay nümayəndələri, artıq o ağır günlər arxada qalıb. Biz sınağa çəkilmiş Xalq Cəbhəsini sizinlə birlikdə böhrandan çıxara bildik. Mən verdiyim sözün üzərində dayanaraq, Müsavat Partiyasına qayıtmaq istəyirəm. Bu gün Xalq Cəbhəsi rəhbərliyindəki daha mübariz, ciddi, ardıcıl mübarizə aparan dostlarımıza uğurlar diləyirəm və mənim istefamı qəbul etməyinizi xahiş edirəm”.

İbrahim İbrahimli əmindir ki, bu uydurma ittiham da hakimiyyətin Milli Şuraya, orada təmsil olunan prinsipial insanlara qarşı təxribat və qarayaxmasıdır. Hədəf kimi Milli Şuranın rəhbər orqanında təmsil olunan dərin və ciddi siyasi bioqrafiyası olanlardan iki nəfərin seçilməsi də təsadüfi deyil. Məqsəd Milli Şura rəhbərliyindəki şəxslər arasında münasibətin sağlam olmadığı təəssüratını yaratmaqdır.