Deputat olmaq istəyən namizəd vaxtından əvvəl təşviqata başladı – MSK tədbir görəcəkmi?

123 Saylı Kəlbəcər Seçki Dairəsindən deputatlığa bitərəf namizəd Mircəlil Qasımlı Seçki Məcəlləsinin tələblərini kobud surətdə pozub.

SƏHƏRMEDİA gununsesi.info-ya istinadla xəbər verir ki, deputatlığa namizədliyi qeydə alınan Mircəlil Qasımlı qanunla nəzərdə tutulmuş vaxtdan əvvəl seçki təşviqatına başlayıb.

Belə ki, özünün təşviqat materiallarını dərc etdirən namizəd bunları özünün sosial şəbəkə hesabında paylaşıb.

Halbuki, Seçki Məcəlləsinin 72.3, 74.1.2, 74.1.4, 75.2 maddələrinə əsasən, namizəd və ya onun səlahiyyətli nümayəndəsi, siyasi partiyanın, siyasi partiyalar blokunun səlahiyyətli nümayəndəsinin seçkiqabağı təşviqat aparması səsvermə gününə 23 gün qalmış başlanır, səsverməyə 24 saat qalmış dayandırılır.

VII Çağırış Milli Məclisə keçirilən seçkilərdə isə təşviqat avqust  ayının 9 da başlanır.

Adıçəkilən namizədin 2 gündür ki, təşviqatla məşğul olmasına baxmayaraq, Mərkəzi Seçki Komissiyası bu barədə hər hansı tədbir görməyib.

"SƏHƏRMEDİA" xəbər portalı olaraq Mircəlal Qasımlı ilə əlaqə yaradıb bu barədə açıqlama almaq istəsək də, əfsuslar olsun ki, əməkdaşımızı blokladı və cavab verməkdən yayındı.