“Doyub yad ellidən, qaçqından Bakı”- Video

Bu gün şair Baba Pünhanın doğum günüdür. Şair 1948-ci il noyabrın 5-də Bakının Kürdəxanı kəndində doğulub.


“Qafqazinfo” Baba Pünhanın “Bakının dərdi var Bakı xəstədir” adlı şeirini oxuculara təqdim edir.



Yorğundur, yatmayır haçandan Bakı,

Doyub yad ellidən, qaçqından Bakı.

Üzülüb, öləcək acından Bakı,

Məğrur görünsə də o can üstədir,

Bakının dərdi var Bakı xəstədir.



Yaltaqlar dəstəsi baş alıb gedir,

Qeyrət yavaş-yavaş boşalıb gedir,

Məktəbli qızlar da qaş alıb gedir,

Ərlidə, ərsiz də bir həvəsdədir.

Bakının dərdi var, Bakı xəstədir.



Əsrlər itirdik illər içində,

Qanqallar bitirdik güllər içində,

Çaqqallar dolaşır ellər içində,

Aslanlar, pələnglər daş qəfəsdədir,

Bakının dərdi var, Bakı xəstədir.



O, Cıdır düzüyçün çadır ağlayır,

Çadır övladıyçün Cıdır ağlayır,

Namus itkin düşüb abır ağlayır,

Köməksiz qız-gəlin dəstə-dəstədir.

Bakının dərdi var, Bakı xəstədir.



Sən ey "Qız qalası" qalasan hələ,

Səni həmişə qız qalasan hələ,

Dərdini Pünhana qala sən hələ,

Ta ki, göz yollarda qulaq səsdədir,

Bakının dərdi var Bakı xəstədir.




Baba Pünhanın digər şeirlərini aşağıdakı videoda öz dilindən dinləyə bilərsiz:
[media=http://www.youtube.com/watch?v=iU6Hw1qvd1E#t=230]