Azərbaycanda qəbirstanlıqdakı lövhə görənləri şoka saldı (VİDEO)

Yeni Suraxanıda qəribə bir addım atılıb. Qəbirstanlıqda bir lövhə vurulub. Orda yazılanları görüb şoka düşməmək olmur.

İslam dininə görə bir adam dünyasını dəyişərsə, onun qısa bir zamanda basdırılması vacib əməllərdən sayılır. Bunun üçün də şəhər və qəsəbələrdən kənarda qəbirstanlıqlar salınır ki, vəfat edənlər orada dəfn edilsin. Amma Yeni Suraxanı rayonu, 14 iyun küçəsində yerləşən qəbirstanlıqda - “Yeni Suraxanıda qeydiyyatda olmayanlar dəfn olunmur” yazısı bizdə təəccüb doğurdu. Bu zaman ortaya bir sual meydana gəlir. Bəs dünyadan köçən harada basdırılmalıdır. Yəni bunun üçün xüsusi qəbirstanlıqmı olmalıdır? Məsələni aydınlaşdırmaq üçün məzarlıqda məsul şəxsləri nə tapa bildik, nə də bir məlumat əldə etmək mümkün oldu. Məsələyə münasibət bildirən ilahiyyatçılar dedi ki, qəbirstanlıq tərəfindən verilən bu qərar islama heç də xoş olmayan bir haldır.

“İslam dinin baxşında bir insan dünyasını dəyişərsə, onun dəfnində mütləq qeydiyyat deyə bir şey buyrulmayıb. Sadəcə olaraq dəfn olunması və ona məxsus olan əməllər buyurulub. Qeydiyyat məsələsinin dini baxımdan heç bir əsası yoxdur. Din bunu normal qəbul etmir. Çünki hər bir şəxs insandır və hər bir kəs də bir gün dünyasını dəyişəcək. Bu baxımdan hamı üçün torpaq eyni olmalıdır” – deyə ilahiyyatçı Hacı Fuad bildirib.

Biz də bu qəribə lövhənin nəyə xidmət etdiyini öyrənmək üçün Bakı Şəhər İcra Hakimiyyəti ilə əlaqə saxladıq. Qurumdan bildirdilər ki, həmin qəbirstanlıq İcra hakimiyyətinin nəzarətində deyil.

Biz də Suraxanı Rayonu İcra Hakimiyyəti ilə əlaqə saxladıq. Qurumdan verilən məlumata görə, həmin qəbirstanlıq onların da nəzarətində deyil. Amma ilkin ehtimala görə, bu yazının məqsədi ərazidə, kənardan gətirilən cənazələrin dəfn edilməsinin qarşısını almaqdır, deyə bildirdilər. Belə olan halda qəbirstanlığın kimin nəzarətində olduğu və bu qaydaları kimin tərtib etdiyi naməlum olaraq qaldı.