Ukrayna Rusiyaya qarşı sanksiyaların sərtləşdirilməsinin qarşısını aldı

Kiyev Kremlin Donbasla bağlı sülh planını qəbul edəcəyinə ümidlidir
“Ukrayna, Almaniya, Fransa, Rusiya xarici işlər nazirlikləri təmsilçilərinin Berlində keçirdikləri görüş son dərəcə gərgin olsa da “Normand formatı”nda dövlət başçılarının danışıqları üçün nəticələr əldə etmək mümkün oldu”. Bu sözləri Ukraynanın Almaniyadakı səfiri Andrey Melnik “Tvitter” hesabında paylaşıb.

Yada salaq ki, fevralın 11-də Minskdə Ukrayna, Fransa, Rusiya prezidentləri və Almaniya kansleri arasında Donbas konfliktinin nizamlanması üzrə danışıqlar aparılacaq. Fevralın 9-da danışıqlarla bağlı gözləntilərini yerli mediaya açıqlayan Ukrayna prezidenti Petro Poroşenko deyib ki, görüşdə sülh planının qəbul ediləcəyinə ümid edir.

Avropa Birliyi xarici işlər nazirləri Ukraynanın təşəbbüsü ilə Rusiyaya qarşı iqtisadi sanksiyaların sərtləşdirilməsini planlarının müzakirəsini təxirə salıb. Bu haqda RAR-a açıqlama verən Polşanın xarici işlər naziri Qjeroq Sxetına deyib ki, Ukrayna belə bir təşəbbüsü Rusiyanın fevralın 11-də təklif olunacaq sülh planını imzalayacağına ümid etdiyi üçün irəli sürüb: “Belə bir xahiş Ukraynadan gəlib. Kiyev ümid edir ki, Kreml Donbasla bağlı sülh planın imzalayacaq və bölgədə davamlı atəşkəs elan ediləcək. Bu təşəbbüs olmasaydı, yeni sanksiyalar müzakirə ediləcəkdi, hətta onların fevralın 16-dan tətbiqi planlaşdırılırdı. Ukrayna tərəf isə hesab edir ki, bu məsələnin danışıqlardan sonraya saxlanması Rusiyanın mövqeyində müəyyən yumşalmalara səbəb ola, eyni zamanda münaqişənin çöxünü üçün yeni şanslar yarada bilər”.

Polşanın xarici ilşər naziri onu da bildirib ki, fevralın 11-də “Normand formatı”nda keçirilən danışıqlar prosesin hansı istiqamətdə gedəcəyini müəyyən edəcək: “Əsasən Rusiyanın mövqeyindən asılı olaraq ya silahlar susacaq, ya da regiondakı böhran daha uzunmüddətli mərhələyə keçəcək”.

Bu arada Rusiya Ukraynanın güney-doğusunda demilitarizasiya təşəbbüsü ilə çıxış edib. Xəbəri ATƏT-in müşahidə missiyası yayıb. ATƏT xəbər verir ki, Rusiya Silahlı Qüvvələri Baş Qərargahının xüsusi qrupunun hazırladığı sənəd artıq Ukrayna Müdafiə Nazirliyinə təqdim edilib. Yaxın günlərdə sənədin ATƏT təmsilçilərinin iştirakı ilə ortaq müzakirəsi gözlənilir.

ATƏT-in baş katibi Lamberto Zanyer bu haqda açıqlamasında deyib ki, indilik Donbas üçün ən pis variant konfliktin dondurulmasıdır: “Hələlik durumun deeskalasiyanın yolları tapılmalıdır. Bundan sonrakı addımlar isə daha çox durumdan çıxış yolunu müəyyən edəcək siyasətçilərin işidir. Çox təəssüf, biz beynəlxalq missiya olaraq Ukraynanın doğusunda baş verənləri nəzarətdə saxlaya bilmirik. Düşünürük ki, bu durum getdikcə daha böhranlı hala keçə bilər. Ona görə də atəşkəsin dərhal təmin olunması, dinc əhalinin ziyan görməməsi üçün təcili addımlar atılmalıdır”.

Yanvarın 31-dən fevralın 5-nə qədər Donbasda hərbi əməliyyatlarda 263 dinc sakin həlak olub. Xəbər Birləşmiş Millətlər Təşkilatının Ukraynadakı durumla bağlı hesabatında yer alıb. Hesabatda bildirilir ki, həlak olan sakinlərin sayı 674-dür. BMT Rusiyanın hərbi təcavüzü nəticəsində həlak olan uşaqların da sayını açıqlayıb. 2014-cü ilin martından, 2015-ci il martın 6-na qədər Ukraynanın qaynar nöqtələrində 59 uşaq həlak olub, 153-ü yaralanıb.

Birləşmiş Millətlər Təşkilatı bildirir ki, Dünya Səhiyyə Təşkilatı münaqişə başlayan gündən Ukraynada aktiv fəaliyyət göstərir.

ABŞ prezidenti Barak Obama mayın 9-da Moskvada faşizm üzərində qələbənin 70 illiyi ilə bağlı qutlamalara qatılmayacaq. TASS bu xəbəri ABŞ prezidentinin köməkçisi Ben Rodsa istinadən yayıb. Ben Rods Ağ Evdə xarici media təmsilçiləri ilə görüşdə deyib ki, ABŞ-ın həmin mərasimdə dövlət başçısı səviyyəsində təmsil olunacağı gözləmir.

Ukraynaya hərbi təcavüzdən sonra daxili durumunda həm iqtisadi, həm sosial baxımdan ciddi dəyişikliklər yaranan Rusiyada yaxşılığa doğru heç bir dəyişiklik müşahidə olunmur. Unian.net yazır ki, Rusiyanın Qərb qarşısında geri çəkilməsini heç bir halda qəbul etməyənlərlə yanaşı dinc əhalinin ziyan çəkdiyinə görə Ukraynaya hərbi müdaxilənin dayandırılmasını istəyənlər də az deyil. “Levada-senter” sorğu mərkəzinin apardığı araşdırmada isə bildirilir ki, Rusiyada ABŞ əleyhdarlarının sayı yüksək sürətlə artır. Sorğuda iştirak edən respondentlərin 42 faizi Rusiya ilə ABŞ arasındakı münasibətləri “düşmən münasibət” sayır. Sorğu mərkəzi qeyd edir ki, ötən il bu rəqəm 4 faiz olub və vətəndaşlar ABŞ-ı daha çox Rusiyanın rəqibi kimi qiymətləndirib. ABŞ-a qarşı neqativ münasibət göstərənlərin sayı isə ötən illə müqayisədə 41 faizdən 84 faizə yüksəlib. Rəyi soruşulanların 71 faizi Avropa Birliyini Rusiyaya mənfi münasibət bəslədiyini düşünür. 40 faiz isə hesab edir ki, bütün gərginliklərə baxmayaraq Rusiya Avropa Birliyi ilə münasibətlərini dərinləşdirməlidir. Sorğuda iştirak edənlərin 36 faizi ölkənin Avropa Birliyi ilə münasibətlərinin məsafəli olmasını doğru sayır.

Sosioloji sorğunun sonuclarında o da bəlli olub ki, vətəndaşların cəmi 27 faizi Rusiyanı dünyanın nüfuzlu ölkəsi sayır. Ötən il bu rəqəm 45 faiz idi.

Sorğunun iqtisadi və sosial problemlərlə bağlı bölümündən isə aydın olub ki, Qərbin iqtisadi sanksiyalarından sonra 79 faizin durumu çətinləşib. Sorğuya qatılanların 47 faizi artıq ciddi maliyyə böhranı yaşadıqlarını bildirib.

Aygün Muradxanlı