Qarabağda gecə döyüşləri: çoxlu erməni əsgəri öldürüldü!

“Ermənistan rəhbərliyi özünü lal-karlığa vurub...”; Müdafiə Nazirliyi: “Düşmənin itkiləri daha böyükdür...”; Azərbaycan tərəfə qaçmış Andranik Qriqoryanın işğalçı orduda başıpozuqluğun hökm sürdüyü barədə dedikləri bir daha təsdiqini tapır; erməni hərbçiləri arasında vərəm və suçiçəyi epidemiyası da yayılıb...
Cəbhə xəttində düşmənin xain təxribatları davam edir. Son vaxtlar bu təxribatlar tez-tez lokal döyüşlərə gətirməklə yanaşı, həm də diqqətçəkicidir ki, işğalçı qüvvələrin daha ağır itkilər verməsi ilə müşayiət edilməkdədir.


Son dəfə - Novruz bayramı ərəfəsində törədilən bu cür təxribatların birində erməni tərəfi rəsmi məlumata görə, 20-dək hərbçisini itirmişdi. Düşmən tərəf 5 ölüm faktını (bir yaralının sonradan hospitalda keçindiyi deyilirdi) təsdiqləsə də, az sonra (martın 22-də) silahını ataraq Azərbaycan tərəfə keçən hərbçi Andranik Qriqoryanın söylədikləri itkilərin həqiqətən 5–dən çox olmasına və erməni işğalçı ordusunda acınacaqlı ab-havanın və başıpozuqluğun hökm sürdüyünə şübhə yeri saxlamadı.

Belə bir qənaətin bir təsdiqi də Ermənistan prezidenti Serj Sərkiyanın həmin günlərdə “France 24” telekanalına verdiyi müsahibədə müharibə xofunu dilə gətirməsi sayıla bilər. Sərkisyan demişdi: “Qəfil insidentlər eskalasiyaya gətirə bilər. Bu, əlbəttə ki, bizi narahat edir. Ermənistan müharibədən qorxur, şəxsən mən də qorxuram”. Ancaq Sərkisyan bilməlidir və yəqin bilir də ki, Azərbaycan ərazilərinin işğalı davam etdikcə müharibə ehtimalı da həmişə qalacaq və yad torpaqlar onun hərbçiləri üçün gec-tez məzara çevriləcək.

*****

Artıq çevrilir də. Belə ki, martın 29-dan 30-na keçən gecə Azərbaycan və Ermənistan qoşunlarının təmas xəttində döyüşlərdə düşmən tərəfin növbəti dəfə ciddi itki verdiyinə dair məlumatlar yayılıb. Virtualaz.org xəbər verir ki, bu haqda express.am və ilur.am erməni saytlarında məlumatlar yer alıb.




“Ötən sutka ərzində biz gözləyirdik ki, hökumət öz vətəndaşlarına həqiqətləri deyəcək. Lakin növbəti dəfə “DQR” və Ermənistan əhalisi çaşqınlıq vəziyyətindədir. Belə ki, 29-30 mart tarixlərində cəbhənin bir çox istiqamətlərində toqquşmalar olub. Tavuş istiqamətində bir hərbçi daxili orqanlarını deşib keçən çoxsaylı güllə yaralarından ölüb. Yuxarı Seyid-Əhmədli istiqamətində (Ağdam-red.) bir əsgər həlak olub. Qarakənd istiqamətində dörd ölü var. Talış istiqamətində Ermənistan vətəndaşı öldürülüb” - məlumatlarda deyilir.

Düşmən ölkə KİV-ləri onu da yazır ki, erməni hərbçiləri arasında vərəm və suçiçəyi epidemiyası yayılıb. Yerli əhalinin bildirdiyinə görə, yaralılar və xəstələr üçün dərman çatışmır. Bu üzdən yaralılar və vərəm xəstələri üçün Qarakəndə dislokasiya olunmuş 3-cü polkun 4-cü batalyonunda səhra hospitalının yaradıldığı bildirilir.

“Lakin heç bir şübhə yoxdur ki, bu dəfə də bizim rəhbərliyimiz özünü lal və karlığa vuracaq. Müdafiə Nazirliyinin şəffaf olmayan fəaliyyəti, vətəndaş cəmiyyətinin nəzarətinin yoxluğu, deputat korpusunun laqeydliyi bundan sonra da erməni ordusunda itkilərə səbəb olacaq” - erməni KİV-ləri yazır.

Burdaca qeyd edək ki, Ermənistan Müdafiə Nazirliyi ötən gün (axşam) deyilən istiqamətdə həqiqətən bir əsgərini itirdiyini rəsmən təsdiqləyib. Bu – 20 yaşlı Ovsep Andeasyandır. Yəqin ki, davamı da gələcək.

*****

Azərbaycan Müdafiə Nazirliyi isə martın 29-30-da ermənilərlə cəbhədə döyüşlərin olduğunu təsdiqləyib: “Lakin erməni tərəfinin itkiləri heç də erməni mediasında bildirildiyi kimi 7 nəfər yox, daha çoxdur. Sadəcə, hələ onların qeyri-rəsmi formada açıqladıqları budur. Yəqin ki, ermənilər öz itkilərini dəqiqləşdirməklə məşğuldurlar. Konkret olaraq dünən (srağagün -red) axşam gedən döyüşlərdə erməni tərəfinin çoxlu itkiləri olub və bu itkilər göstərilən rəqəmlərdən qat-qat artıqdır. Yəqin ki, onlar itkilərini yavaş-yavaş, tədricən ortaya çıxaracaqlar”.



Bunu “Trend”in sorğusuna cavab olaraq Müdafiə Nazirliyinin mətbuat xidmətinin rəisi, polkovnik Vaqif Dərgahlı bildirib. İşğalçı orduda vərəmin və digər xəstəliklərin yayılmasına gəlincə, Dərgahlı bildirib: “Biz dəfələrlə demişik ki, erməni tərəfi həm döyüşlərdəki, həm də xəstəliklər nəticəsində olan itkilərini gizlədir. Bu barədə yayılan məlumatlar isə həqiqətdir”.

Nazirlik sözçüsü Ermənistanın hərbi-siyasi rəhbərliyinin xalqına yalan danışmaqla məşğul olduğunu da qeyd edib: “Əslində erməni ordusunda intizamsızlıq baş alıb gedir. Martın 22-də biz tərəfə keçən erməni hərbçisi Andranik Qriqoryan da məhz bu səbəblərdən döyüş mövqeyini atıb qaçmışdı. Onun səngər yoldaşları öz həmkəndliləri olduğu üçün ona atəş açmamışdılar. Ermənistanın müdafiə naziri həmin əsgərin valideynlərini günahkar çıxarır. Valideynlər isə bildiriblər ki, hərbi hissələrdə baş verən intizamsızlıq nizamnamədənkənar münasibətlərdir, özbaşınalıqlardır”.



*****

Əlavə edək ki, son zamanlar qardaş Türkiyənin də dəstəyi ilə Azərbaycan Silahlı Qüvvələrinin döyüş qabiliyyətinin artırılmasına yönəlik addımlar, o sırada müdafiə naziri Zakir Həsənovun səngərlərə tez-tez baş çəkməsi düşmən qüvvələrə daha ruhdan salıcı təsir göstərməkdədir.

Siyasət şöbəsi