"Söyüşə görə həyatıma son qoymaq istəyirəm" - Aşıq Ədalət

Bu günlərdə Aşıq Ədalətin efirdə söyüş söyməsi ölkə mətbuatında ciddi rezonans doğurdu. Bu barədə yayılan videodan da məlum olur ki, ustad sənətkar ATV-də yayımlanan “Səbəbkar” verilişində rəqqasə Aytənin və həmkarı Namiqin ünvanına söyüş xarakterli ifadələr işlədib.

Lakin sonradan yayılan məlumatlara görə, Aşıq Ədalət söyüşlə bağlı videonun yalan olduğunu, adıçəkilən rəqqasəni isə ümumiyyətlə, tanımadığını bildirib. Hətta yayılan videonun montaj edildiyi barədə də iddialar ortaya çıxıb.

Axşam.az-ın məlumatına görə, məsələ ilə bağlı Aşıq Ədalət musavat.com-a maraqlı açıqlamalar verib. Belə ki, o, efirdə söyüş söydüyünü təsdiqləyib və bu hərəkətinə görə özünü bağışlamadığını deyib:

“Ay başınıza dönüm, ay vətən övladlarım, bu işin necə baş verdiyini hələ də anlaya bilmirəm. Olayla bağlı videoya baxıram, başa düşə bilmirəm, o an mənə nə olmuşdu ki, efirdəcə söyüş söydüm. Hər videoya baxanda dəhşətə gəlirəm. Etdiyim bu hərəkət doğru deyildi. Bu, heç cür mənim şəxsiyyətimə, adıma yaraşmır. Bir daha deyirəm, söyüş söydüyümə görə özümü bağışlaya bilmirəm. Onda mənə nə olmuşdu, bax, bunu da dərk etmirəm. Kim nə deyirsə-desin, bu hərəkətim qəbuledilməzdir. Efir ictimai yerdir, tənqidi də gərək qaydasında deyəydim”.

Aşıq Ədalət efirdəki qalmaqala görə artıq yaşamaq istəmədiyini də dilə gətirib:

“Efirdəki olaydan sonra el-oba, xalq arasına çıxmaq istəmirəm. Utandığımdan mənə gələn zənglərə də cavab vermirəm. Ümumiyyətlə, yaşamaq istəmirəm. İstəyirəm ki, həyatıma son qoyum. Bundan sonra el arasında mən necə gəzəcəm? İndi elə bir vəziyyətdəyəm ki, özümün özümdən zəhləm gedir..”

Ustad sənətkar kimi söydüyünü belə xatırlamadığını deyib:

“İş burasındadır ki, heç xatırlamıram, mən kimi və niyə söymüşəm. Mən o rəqqasəni də tanımıram. And olsun Allaha ki, mən Namiqi də söyməmişəm, heç vaxt onu təhqir etmək fikrində də olmamışam. Söyüşü niyə öz üstünə götürüb, bunu da anlamıram. Dünən Namiq yanıma gəldi. Mənə hədiyyə də gətirmişdi. Olanları başa saldım. Mənim heç kimlə ədavətim yoxdur. Bu sənət mənim üçün müqəddəsdir və bu günəcən də yalnız öz sənətimlə məşğul olmuşam”.

Xalq arasında Dədə Ədalət kimi tanınan aşıq saz sənətini bayağılaşdıran gənc aşıqlardan danışıb:

“Bu saz Dədə Qorquddan bizə yadigardır. Sazı dünyaya tanıdana kimi içi mən qarışıq, nə qədər aşıqlarımız xeyli əziyyət çəkiblər. Gözlərimizdən qan gəlib, kipriklərimizlə od götümüşük, baş qoymuşuq bu sənətdə, onu kifayət qədər təkmilləşdirmişik. Bu gün isə hər yerindən duran əlinə saz alıb, çayxana, restoranlarda, məclislərdə oxuyur, sağa-sola meydan sulayır. Sazı əllərində elə tuturlar ki, sanki yun çırpırlar, onun başına hər oyun açırlar. Soruşanda ki, “ay bala, bu sənəti niyə bu günə qoyursan?”, cavabında üzünə qayıdıb deyirlər ki, “aşıq, mən həvəskar aşığam, elə-belə toylarda çalıb-oxuyuram”, qalırsan lap mat–məəttəl... Belələri ancaq onu fikirləşir ki, “nə edim-etməyim 5-10 manat pul qazanım”, vəssalam... Unudurlar ki, bu yolla sazımızı gözdən salırlar”.

Aşıq Ədalət toylarda “Yanıq Kərəmi” havasına oyanayanları qınayıb:

“Yüz dəfə demişəm ki, “Yanıq Kərəmi”nə oynamaq olmaz! Amma di gəl ki, toylarda onu lap “Tərəkəmə” kimi çalıb-oynayırlar. Gedin yazıq Kərəminin faciəsini oxuyun, görün onun başına nələr gətirilib. Bizim aşıqlar isə onu elə ifa edirlər ki, adam lap yanıb tökülür”.

Ustad sənətkar bu barədə Mədəniyyət və Turizm Nazirliyinə də səslənib. Onun sözlərinə görə, aidiyyatı orqanlar saz sənətini ucuzlaşdıranlara qarşı vaxtında ciddi tədbir görməlidir:

“Demək olar ki, mütəmadi olaraq mənə İrandan, Türkiyədən zənglər, iradlar gəlir. İnsanlar mənə deyirlər ki, “aşıq, niyə icazə verirsiz ki, bu sənət ucuzlaşsın, niyə öz münasibətinizi, tənqidinizi bildirmirsiz?”. Bu sənəti yaşatmaq, onun bayağılaşmasına qarşı gəlmək təkcə mənim və yaxud bir neçə qocaman aşığın üzərinə düşmür. Bu məsələyə aidiyyatı orqanlar, o cümlədə, Mədəniyyət və Turizm Nazirliyi də qarışmalıdır. Yoxsa, bu sənət getdikcə itib–batır, bayağılaşır. Xalqı ayıltmaq lazımdır ki, sənəti olmayan aşıqlara meydan verilməsin”.

Qeyd edək ki, sözügedən video mətbuatda, sosial şəbəklərdə yayımlanandan sonra rəqqasə Aytən onun ünvanına söyüş işlətdiyi üçün Aşıq Ədaləti məhkəməyə verdiyini bildirmişdi. Rəqqasə həmçinin “Səbəbkar” verilişinin aparıcısı İradə İsakı, eləcə də onun təhqir edilməsini gülüşlə qarşılayan və verilişdə qonaq qismində iştirak edən digər sənətçiləri də qınayaraq tənqid etmişdi. Qalmaqala səbəb olan verilişin aparıcısı İradə İsak isə efirdəki söyüş məsələsinə münasibət bildirərək, olayı “ustad şapalağı” adlandırmışdı.