Qətl şahidi olan nazir qardaşı müalicədən qayıtdı

Qusarın Çiləgir kəndində nəqliyyat naziri Ziya Məmmədovun qardaşı Nəriman Məmmədovla quda olan 70 yaşlı Ramiz Gülməmməd oğlu Vəliyevin qətlə yetirilməsi işi üzrə istintaq davam edir. Rəsmi olaraq qətlin motivi açıqlanmasa da, mətbuatda bu haqda kifayət qədər məlumat yayılıb. Virtualaz.org-un məlumatına görə, qətli törədən Eynulla Hacıyev nazirin qardaşının qudasının evində gözətçi işləyib. Hadisə vaxtı N.Məmmədov qudasının villasında istirahətdə olub.

Gözətçi E.Hacıyev R.Vəliyevi güllələyəndə nazirin qardaşı da ruhi sarsıntı keçirib, onun hətta qorxudan dili tutulub. Onu əvvəlcə rayon xəstəxanasına, oradan isə Bakıya gətiriblər. Sonradan isə məlum oldu ki, nazirin qardaşını Bakıdan Türkiyədəki xəstəxanalardan birinə aparıblar. Ən son məlumata görə, N.Məmmədov artıq Türkiyədən qayıdıb. Onu səhhətində hər hansı bir problem yoxdur.

Yada salaq ki, iyunun 30-da baş vermiş bu olaydan sonra yerli sakinlər R.Vəliyevin Eynulla Hacıyev adlı kənd sakini tərəfindən namus üstə öldürüldüyünü açıqlamışdılar. Demişdilər ki, hadisə biznesmen Ramiz Vəliyevin Çiləgir kəndindəki villasında baş verib. Eynulla Hacıyev bu villada gözətçi, onun bacısı isə qulluqçu işləyirmiş. O, qətli də bacısının şərəfini qorumaq üçün törədib. Eynulla Hacıyev hüquq-mühafizə orqanları tərəfindən saxlanılıb. Qusar rayon prokurorunun köməkçisi Anar Salehov Çiləgir kəndində baş verən qətl hadisəsini “Amerikanın səsi”nə təsdiqləmişdi.

Cinayətin motivinə gəlincə isə Anar Salehov bu barədə məlumat verməyib. “Hazırda istintaq gedir. Cinayətin motivi və gedişi ilə bağlı rəsmi məlumat yayılacaq” - deyə prokuror köməkçisi qeyd edib.

“Turan” agentliyinin xəbərində isə deyilir ki, gözətçi öz ailəsinin şərəfini qorumaq üçün R.Vəliyevi güllələyib. Faktla bağlı Qusar Rayon Prokurorluğunda Cinayət Məcəlləsinin 120-ci maddəsi (qəsdən adam öldürmə) ilə cinayət işi başlanıb.
http://musavat.com/
E.HÜSEYNOV