Bakının uşaq bağçalarında su çiçəyi yayılıb

Ölkədə uşaq bağçalarında su çiçəyinə yoluxma halları artıb.
Məlumatna görə, paytaxtın əksər məktəbəqədər təhsil müəssisələrində mart ayından başlayaraq su çiçəyi xəstəliyinə yoluxan uşaqların sayında kəskin artım müşahidə olunur.

Paytaxtın 126 saylı uşaq bağçasında xeyli sayda uşaq bu xəstəliyə yoluxduğundan bağçaya gəlmir. Valideynlərin sözlərinə görə, su çiçəyi rast gəlinən qrup onların şikayətindən sonra bağlanıb.
Bağça rəhbərliyi isə deyilənlərlə razılaşmayaraq müəssisədə heç bir xəstəliyin qeydə alınmadığını deyir.
Analoji vəziyyət paytaxtdakı bir sıra uşaq bağçalarında müşahidə olunur.

Faktı Gigiyena və Epidemiologiya Mərkəzinin şöbə müdiri Afaq Əliyeva da qismən təsdiqləyib. Afaq Əliyeva ANS TV-yə açıqlamasında uşaqlar arasında yaz fəsli girəndən su çiçəyinə yoluxma hallarının artımının müşahidə olunduğunu deyib.
Afaq Əliyeva deyir ki, düzdür, son günlər bu xəstəliyə yoluxma halları qeydə alınır: “Amma ötən ilin müvafiq dövrü ilə müqayisədə su çiçəyinə yoluxma halları artmayıb. Ona görə də nəinki uşaq bağçalarında, məktəblərdə də profilaktik tədbirlər gücləndirilməlidir. Bu xəstəlik yoluxucu olduğundan su çiçəyi çıxardan uşaqlar bağçaya buraxılmamalı, həkim nəzarətində saxlanılmalıdır”.
Ekspert yüngülləşdirici profilaktik tədbirlər kimi kütləvi məskunlaşma yerlərində, bağça və orta ümumtəhsil məktəblərində sanitariya qaydalarına düzgün əməl olunmasını vacib sayır. Uşaqlar arasında hansısa virus və bakterial infeksiyaların meydana çıxmasının qarşısı vaxtında aşkar edilərək onlar kollektivdən təcrid olunmalıdır.
[media=http://www.youtube.com/watch?v=gtI9Z0U2Hfo]

Afaq Əliyeva su çiçəyi xəstəliyinə qarşı peyvənd təqvimində vaksinasiyanın olmadığını da söyləyib. Onun sözlərinə görə, dünyada su çiçəyinə qarşı peyvənd işləri aparılsa da ölkədə peyvənd təqviminə daxil olunmayıb.
Səhiyyə Nazirliyi isə xaricdən daha təhlükəli xəstəliklərə qarşı vaksinlərin gətirilməsini təmin edir. Tədricən su çiçəyi və digər infeksion xəstəliklərə qarşı vaksinlərin alınması nəzərdə tutulur.