Zibillikdən tapılan körpədən şad xəbər

Bir neçə gün öncə hər kəsə tanıtmağa çalışdığımız yeni doğulan və zibillikdən tapılan Nərminin ziyarətçiləri günü-gündən çoxalır.

ANS PRESS-in məlumatına görə, təsadüfən Nərmini Qarayev adına 2 saylı uşaq kliniki xəstəxanasında görməsəydik, onun vəziyyətinə yanıb səs salmasaydıq bəlkə də körpə indi kim bilir haralarda idi. Bir neçə gün əvvəl aclıq və ağrıdan ağlayaraq göyərən körpəyə tibb bacıları heç yaxın belə getmədikləri halda, indi Nərminin vəziyyəti yaxşıdır. Çünki artıq onunla bütün Azərbaycan maraqlanır. Dünyaya gələr-gəlməz acımasız həyatın ağuşuna atılan Nərminin halına hər kəs acıyır... Hətta onu övladlığa götürmək istəyənlər də var. Sosial şəbəkələrin də ən çox danışılan mövzusuna çevrilən körpə qızcığazı ziyarət etmək istəyənlərin sayı-hesabı yoxdur.

Körpə haqqında xəbər demək olar ki, bütün Azərbaycanı sarsıtdı. Sıravi insanlardan tutmuş sənətçilərə qədər onun ziyarətinə gəldilər. Analıq məzuniyyətindən yeni qayıdan gənc müğənni Ayan Babakişiyeva da onların sırasındadır. İfaçı körpə ilə şəkil çəkdirərək sosial şəbəkədə paylaşıb, onun yaxşı olduğunu bildirib. Bu halda bizə buna ancaq sevinmək düşər. Baş verənlərdən təsirləndiyini deyən ifaçı fikirlərini bölüşüb:

“Balaca körpənin zibillikdən tapılma xəbərini oxudum və mənə çox pis təsir etdi. Bir az öncə xəstəxanada yanında idim. Qardaşım Samir də durmadan mənə zəng edib, Nərminin yanına getməyimi istəyirdi. Çünki özü İstanbulda yaşadığından ona əli çatmır", - deyə müğənni bildirib. Qeyd edək ki, artıq balaca Nərmini övladlığa götürərək onun qayğısını çəkməyə hazır olan insanlar tapılıb.

Amma Nərmin Əliyeva xəstəxanaya atılan nə ilk, nə də ki, sonuncu körpədir. Sonda balaca Nərminin valideynləri timsalında bütün ana və atalara səslənirik. Övladlarınızı atmayın! Axı bu məsum körpələrin heç bir günahı yoxdur! Onlara Nərminin taleyini yaşatmayın.