Yol polisinə çətin anlar yaşadan Elvin kimdir? – Avtoxuliqanın FOTOSU

Ötən gecə Bakının Nərimanov rayonunda “BMW” markalı avtomobilin sürücüsünün sərxoş halda avtoxuliqanlıq etdiyini xəbər vermişdik.

BiG.AZ xəbər verir ki, hadisə Bakı şəhəri ərazisində reyd aparılan zaman qeydə alınıb.

Belə ki, Heydər Əliyev prospektində “10-LJ-600” dövlət qeydiyyat nişanlı “BMW” markalı avtomobilin sürücüsü Adıgözəlov Elvin Nüsrət oğlu yüksək sürətlə manevr qaydalarını pozduğuna görə, Yol Patrul Xidmətinin 99-YP-481 dövlət qeydiyyat nişanlı xidməti avtomobilində olan yol polis əməkdaşları “Saxla!” əmri verib.

Lakin, sürücü avtomobili saxlamayaraq yol polis əməkdaşlarına müxtəlif bəhanələr gətirib. Polislərə heç bir sənəd təqdim etməyib. İnspektor ondan kəskin spirt qoxusunun gəldiyinə görə Alkaqol sərxoşluğunun yoxlanmılması məntəqəsinə dəvət edib. Sürücü heç bir söz demədən avtomobili ilə yüksək sürətlə ərazidən uzaqlaşıb. Daha sonra isə polis əməkdaşları tərəfindən ələ keçirilib.

İlkin məlumatda avtoxuliqanın atasının Dövlət Gömrük Komitəsində işlədiyi bildirilib. Lakin, DGK-nin mətbuat xidməti məlumat yayaraq bunu təkzib edib, gömrük orqanlarında Nüsrət Adıgözəlov adlı əməkdaş xidmət etmədiyi bildirilib.

Maraqlıdır ki, 10 LJ 600 dövlət nömrə nişanı əvvəllər “Mercedes” (“şessot”) markalı avtomobildə olub. Yenicag.az ötən gecə yol polisinə çətin anlar yaşadan avtoxuliqanın fotosunu əldə edib.