Sabirabadda 25 yaşlı gəncin başını namus üstə kəsiblər

Sabirabadda baş verən qətl hadisəsinin təfərrüatları bəlli olub.
Sabirabad Rayon Prokurorluğundan APA-ya verilən məlumata görə, hadisə bu gün saat 04:00 radələrində Sabirabad şəhəri, Əli Kərim küçəsində baş verib.
Sabirabad rayon sakini, 1992-ci il təvəllüdlü Araz Qabil oğlu Fərəcov aralarında yaranan münaqişə zəminində tanışı, 1989-cu il təvəllüdlü Abbas Nazim oğlu Fətullayevin boğazını kəsici alətlə kəsərək qətlə yetirib.
Sabirabad Rayon Prokurorluğu qətlin motivi barədə istintaq aparıldığından əlavə məlumat verməsə də qətli törədən şəxsin atasının bildirdiyinə görə, qətl namus üstündə baş verib. Belə ki, onun mərhum oğlunun həyat yoldaşının şəkli Nazim Fətullayevin evindən çıxıb. Məhz bu zəmində yaranan mübahisə sonda qətlə səbəb olub.
Hadisəni törədən A.Fərəcov Sabirabad Rayon Polis Şöbəsinin əməkdaşları tərəfindən tutulub. Faktla bağlı Sabirabad Rayon Prokurorluğunda cinayət işi açılıb, araşdırma aparılır.
Bu gün səhər saatlarında Sabirabad rayonunda dəhşətli qətl hadisəsi baş verib.
Bu barədə virtualaz.org saytına Sabirabad Rayon Polis Şöbəsindən məlumat verilib.
Məlumata görə, rayon sakini, 1992-ci il təvəllüdlü Araz Qabil oğlu Fərəcov münaqişə zəminində tanışı, 1989-cu il təvəllüdlü Abbas Nazim oğlu Fətullayevin boğazını kəsib. 25 yaşlı A.Fətullayev hadisə yerində ölüb. Cinayəti törədən Araz Fərəcov isə tutulub.
Sabirabad Rayon Prokurorluğunun müstəntiqi İlkin Abdullayev hazırda hadisə yerindədir, istintaq aparılır.
Baş Prokurorluğun mətbuat xidmətinin rəhbəri Eldar Sultanov hazırda ilkin araşdırma aparıldığını bildirdi: “Cinayətin motivi hələlik bəlli deyil, bu barədə əlavə məlumat veriləcək”.
Qafqazinfo.az saytı Sabirabad Rayon Polis Şöbəsinin rəisi Mübariz Quliyevlə əlaqə saxlayıb. Polis rəisi hadisənin qısqanclıq zəminində baş verdiyini bildirib.
Cinayətin hansı səbəbdən baş verməsi ilə bağlı əlavə məlumat verməyə çalışacağıq.