Krım yarımadasını işğal etmiş Rusiya eşalonlaşdırılmış hava hücumundan müdafiə sistemi qurur və onun buradakı əsas məqsədi Ukrayna silahlı qüvvələrinə aid “Bayraktar TB2” dronlarının zərbəsinin qarşısını almaqdır.
Ukrayna PUA-lardan istifadə etməklə Rusiya Federasiyasına qarşı dəniz müharibəsinə hazırlaşır. Ukraynanın “Armiya İnform” nəşri məlumat verir ki, Ukrayna Hərbi Dəniz Qüvvələrinə məxsus “Bayraktar TB2” zərbə PUA-ları Ukraynanın Qara dənizdə yerləşən “Tendrovskaya kosa” adasında müxtəlif təlim tapşırıqları üzrə manevrlər həyata keçiriblər. Ancaq bu cür uçuşların təfərrüatlı proqramı və təlimlərin konkret vaxtı göstərilmir.
Eyni zamanda bir həftə əvvəl bəlli olub ki, Rusiya Federasiyasının Qara Dəniz donanmasının iki freqatı –“11356 layihəsi”ndən olan “Admiral Makarov” və “Admiral Essen” “şərti düşmən” PUA-larının hücumuna qarşı Qara dəniz akvatoriyasında təlimlər keçiriblər. Bu təlimlər aşağıdakı ssenarilər üzrə gedib: onlar şərti düşmən gəmisinin göyərtəsinə enən PUA-ları aşkarlayırlar. 

Aydındır ki, burada zərbə dronları ilə təchiz edilmiş aviaqrup, Türkiyənin “TCG Anadolu” universal desant gəmisinə eyham vurulur. Rusiya freqatı hücum edən “şərti düşmənin” gəmisinə doğru yaxınlaşır, bunun cavabında “şərti düşmən” öz PUA-larını havaya qaldırır və sonra (təlimin ssenarisinə əsasən) Kremlin gəmiləri Hava Hücumundan Müdafiə sistemlərinin və radioelektron mübarizə vasitələrinin köməyilə dronların şərti hücumunu uğurla dəf edirlər.
Bütün baş verənlərin ardınca gəmi əleyhinə “Kalibr” raketi düşmən güclərinin dronlarını daşıyan şərti gəmini məhv edir.
Burada xüsusu bir məqama diqqət etmək lazımdır. “Bayraktar TB2” zərbə PUA-sının kompleks silah dəstinə 15 kilometr uçuş məsafəsinə malik idarəolunan “MAM-L”(Mikro Akıllı Mühimmat) bombası daxildir. 4 mart tarixində keçirilən “BLUE HOMELAND 2021”(MAVİ VƏTƏN 2021) təlimlərində “Bayraktar TB2” səkkiz kilometr uzaqlıqdakı dəniz hədəfini vurmaq üçün məhz “MAM-L” bombalarından istifadə edib.

Rusların Qara dəniz donanmasındakı dörd gəmisində quraşdırılmış Zenit Raket Komlekslərinin(ZRK) atəş məsafəsi “Bayraktar TB2” -nin daşıdığı “MAM-L” bombasının 15 kilometrlik uçuş məsafəsindən daha uzundur. Belə ki,”1164 layihəsi”ndən olan “Moskva” raket kreyseri( burada C-300 F kompleksindən olan 64 ədəd raket quraşıdrılıb və onların uçuş məsafəsi tipindən asılı olaraq 75-150 kilometr arasında dəyişir) və “11356 layihəsi”ndən olan və uçuş məsafəsi 50 kilometrə çatan “Ştil-1” ZRK kompleksiylə təchiz edilmiş üç freqat fəaliyyətdədir.
Türkiyənin hərbi-siyasi rəhbərliyi bəyan edib ki, onlar zərbə dronlarının daşıyıcısı “TCG Anadolu” universal desant gəmisini əsasən Ankara üçün həssas region olan Aralıq dənizi akvatoriyasında istifadə etməyi planlaşdırırlar. Bu bəyanata uyğun olaraq belə nəticə çıxarmalıyıq ki, Türkiyə Hərbi Dəniz Güclərinə məxsus digər gəmilərin müşayiəti olmadan həmin “TCG Anadolu” desant gəmisinin Qara dənizdə əməliyyat aparması ssenarisi az inandırıcıdır.
Deməli, Krımdakı rus işğalçıları zərbə PUA-larının mümkün hücumlarına qarşı eşalonlaşdırılmış Hava Hücumundan Müdafiə sisteminin yaradılması istiqamətində hazırlıq təlimləri həyata keçirirlər. Rusiya freqatlarında yerləşdirilmiş zenit raketlərindən istifadə həmin sistemin tərkib elementidir. Bu sistemlər Türkiyənin hücumlarna qarşı deyil, Ukrayna PUA-larını dəf etmək hüçün hazırlanır.
“Defense Express” - Ukrayna
Tərcümə: “AzPolitika.info”